वीरगंज (पर्सा), ३१ असोज । नेपाली कांग्रेसको १५औँ महाधिवेशनबाट पर्साका पाँच नेता केन्द्रीय कार्यसमितिमा पुगेका छन् । केन्द्रीय सदस्यमा चार जना निर्वाचित हुँदा सहमहामन्त्रीमा पर्साकै अजय चौरसिया विजयी भएका छन् । तर, सहमहामन्त्री पदमा उम्मेदवारी दिएका सुरेन्द्र प्रसाद चौधरी र केन्द्रीय सदस्यका प्रत्याशी रामरुप प्रसाद कुर्मी भने पराजित भएका छन् ।
केन्द्रीय सदस्यको मधेसी खुला समूहबाट पर्साका अनिल कुमार रुंगटा र अशर्फी साह निर्वाचित भएका छन् । सोही समूहमा प्रतिस्पर्धा गरेका रामरुप प्रसाद कुर्मीले भने सफलता हासिल गर्न सकेनन् । उनी यसअघि विशेष महाधिवेशनबाट कांग्रेसको केन्द्रीय सदस्य बनेका थिए ।
त्यसैगरी, खस आर्य कोटाबाट नेपाली कांग्रेस पर्साका सभापति जनार्दन सिंह क्षेत्री केन्द्रीय सदस्यमा निर्वाचित भएका छन् । मुस्लिम महिला कोटाबाट जमिला खातुन पनि केन्द्रीय कार्यसमितिमा पुग्न सफल भएकी छन् । पर्साका नेता अजय चौरसियाले सहमहामन्त्रीको मधेसी समूहबाट जित हासिल गरेका छन् । कांग्रेसका केन्द्रीय सदस्य तथा पूर्वमन्त्रीसमेत रहेका चौरसियाको विजयसँगै पर्साले पार्टीको केन्द्रीय पदाधिकारीमा प्रतिनिधित्व पाएको छ ।
यता, सहमहामन्त्रीको थारु कोटाबाट उम्मेदवारी दिएका सुरेन्द्र प्रसाद चौधरी भने पराजित भएका छन् । उनी पनि यसअघि विशेष महाधिवेशनबाट कांग्रेसको केन्द्रीय सदस्य बनेका थिए । महाधिवेशनको नतिजासँगै पर्साबाट रुंगटा, साह, क्षेत्री र खातुन केन्द्रीय सदस्यमा निर्वाचित भएका छन् भने चौरसिया सहमहामन्त्री बनेका छन् ।
यसरी जिल्लाले केन्द्रीय कार्यसमितिमा पाँच जना प्रतिनिधि पाउँदा दुई उम्मेदवारले भने पराजय बेहोरेका छन् । पर्साका नेताहरूको यो नतिजाले कांग्रेसको केन्द्रीय नेतृत्वमा जिल्लाको प्रतिनिधित्व पाँच जनामा पुगेको छ । 
प्रतिक्रिया दिनुहोस् !