वीरगंज (पर्सा), ५ चैत । लामो समयदेखि जीर्ण अवस्थामा रहेको नारायणी रंगशालाको प्याराफिट पुनर्निर्माण प्रक्रिया बिहीबारदेखि औपचारिक रूपमा सुरु गरिएको छ । मधेश प्रदेश खेलकुद परिषद्का सदस्य सचिव शिवजी गुप्ताले एक कार्यक्रमबीच शिलान्यास गर्दै निर्माण कार्यको शुभारम्भ गरेका हुन् । शिलान्यास समारोहमा बोल्दै उनले सम्झौतामा उल्लेखित समयसीमाभित्रै काम सम्पन्न हुने विश्वास व्यक्त गरे । यद्यपि, गत भदौ २३ र २४ मा भएको जेनजी आन्दोलन तथा हालै सम्पन्न निर्वाचनका कारण निर्माण कार्य केही समय ढिलाइ भएको जनाइएको छ ।
सरकारले चालू आर्थिक वर्ष २०८२/८३ को बजेटमार्फत रंगशालाको पुनर्निर्माणका लागि ४ करोड रुपैयाँ विनियोजन गरेको थियो । सोही बजेटअन्तर्गत ब्लक ‘सि’ को प्याराफिट निर्माणको जिम्मा काठमाडौंस्थित अन्कुर निर्माण सेवा ले २ करोड १७ लाख ७२ हजार रुपैयाँ (भ्याट बाहेक) मा पाएको छ । राष्ट्रिय खेलकुद परिषद्का इन्जिनियर शिवचन्द्र यादवका अनुसार तत्कालीन केपी शर्मा ओली नेतृत्वको सरकारले नै रंगशाला पुनर्निर्माणका लागि बजेट व्यवस्था गरेको थियो । हाल बजेट निकासा भएपछि निर्माण प्रक्रिया अघि बढाइएको उनले जानकारी दिए । अहिले पुराना जीर्ण संरचनाहरू डोजर प्रयोग गरेर भत्काउने काम सुरु भइसकेको छ ।
पहिलो चरणमा पुराना प्याराफिट हटाएर नयाँ संरचना निर्माण गरिने योजना रहेको छ । पर्सा जिल्ला खेलकुद विकास समितिका अध्यक्ष दीपक कुमार कानुले रंगशालाको बिग्रँदो अवस्थालाई ध्यानमा राख्दै चरणबद्ध रूपमा पुनर्निर्माण गरिने बताए । करिब ३५ हजार दर्शक क्षमता रहेको नारायणी रंगशाला, दशरथ रंगशाला पछिको दोस्रो ठूलो रंगशालाका रूपमा चिनिन्छ । तर मर्मत अभावका कारण पछिल्ला वर्षहरूमा यसको प्रयोग घट्दै गएको थियो ।
स्थानीय खेलप्रेमी र खेलाडीहरूले करिब एक दशकदेखि रंगशालाको पुनर्निर्माणको माग गर्दै आएका थिए । संघीय तथा प्रदेश संसदमा समेत यस विषयमा पटक–पटक आवाज उठाइएको थियो । वि.सं. २०३८ सालमा तत्कालीन अञ्चलाधीश लक्ष्यबहादुर गुरुङ को पहलमा फुटबल मैदान, क्रिकेट मैदान तथा कवर्ड हल निर्माणका लागि १७ बिघा १० कट्ठा जग्गा अधिग्रहण गरिएको थियो । वि.सं. २०४२ मा निर्माण सम्पन्न भएको रंगशालाको उद्घाटन तत्कालीन राजा वीरेन्द्र शाहले गरेका थिए ।
एक समय राष्ट्रियस्तरका प्रतियोगिताहरूको केन्द्र बनेको यो रंगशाला लामो समयदेखि उपेक्षाका कारण निष्क्रियजस्तै बनेको थियो । पुनर्निर्माण कार्य सुरु भएसँगै अब यो रंगशाला पुनः सञ्चालनमा आउने अपेक्षा गरिएको छ ।
प्रतिक्रिया दिनुहोस् !