वीरगंज (पर्सा), ४ चैत । वीरगंज महानगरपालिकाले लामखुट्टेको बढ्दो प्रकोप नियन्त्रण गर्न मंगलबारदेखि एयर स्प्रे (फगिङ) प्रविधिमार्फत विषादी छर्ने अभियान सुरु गरेको छ । यसअघि महानगरले पम्प स्प्रे प्रयोग गरेर औषधी छर्कँदै आएकोमा अब फगिङ विधिलाई समेत जोड दिँदै नियन्त्रण अभियानलाई थप प्रभावकारी बनाइएको हो ।
महानगरका सरसफाइ अधिकृत सर्फुदिन मियाँका अनुसार बिहानको समयमा पम्प स्प्रे प्रयोग गरी औषधी छर्ने र साँझपख एयर स्प्रे (फगिङ) मार्फत विषादी छर्ने कामलाई तीव्र बनाइएको छ । उनले लार्भा अवस्थामा रहेका लामखुट्टेलाई बिहान र दिउँसो नियन्त्रण गर्ने तथा साँझ वयस्क लामखुट्टेलाई फगिङमार्फत नष्ट गर्ने योजना अनुरूप काम भइरहेको जानकारी दिए ।
गर्मी मौसम सुरु भएसँगै वीरगंज क्षेत्रमा लामखुट्टेको संख्या बढ्न थालेको छ । सोही अवस्थालाई मध्यनजर गर्दै महानगरपालिकाले दुवै प्रविधिको संयोजनमा विषादी छर्ने कार्य अघि बढाएको हो । यस अभियानलाई व्यवस्थित बनाउन महानगरले ३२ वटै वडामा लागू हुने गरी तालिका समेत तयार पारेको छ ।
वीरगंजमा विशेषगरी चिसो मौसम समाप्त भएर गर्मी सुरु हुने समय तथा वर्षायामको प्रारम्भमा लामखुट्टेको प्रकोप तीव्र हुने गरेको पाइन्छ । यही अवस्थालाई ध्यानमा राख्दै महानगरपालिकाले हरेक वर्ष दुई चरणमा विषादी छर्ने कार्यक्रम सञ्चालन गर्दै आएको छ ।
महानगर प्रमुख राजेशमान सिंह ले लामखुट्टेको टोकाइबाट सर्ने डेंगु, मलेरिया जस्ता रोगबाट नागरिकलाई सुरक्षित राख्न यस्तो अभियान निरन्तर सञ्चालन गरिएको बताए । साथै, उनले स्थानीयवासीलाई घर–आँगन वरिपरि पानी जम्न नदिन, सरसफाइमा ध्यान दिन र अभियानलाई सफल बनाउन सहयोग गर्न अपिल गरेका छन् ।
प्रतिक्रिया दिनुहोस् !