वीरगंजका होटलमा असुरक्षित मासु प्रयोगको खुलासा, स्वास्थ्यसँग गम्भिर खेलवाड

वीरगंज (पर्सा), ४ चैत । वीरगंजका केही खाजा होटलहरूमा अस्वस्थ तथा चोट लागेको कुखुराको मासु प्रयोग भइरहेको तथ्य बाहिर आएपछि उपभोक्ताहरूमा गम्भीर चिन्ता उत्पन्न भएको छ । विशेषगरी ‘चिकेन ललिपप’ जस्तो लोकप्रिय परिकारमै यस्तो मासु प्रयोग भएको भेटिएपछि खाद्य सुरक्षामाथि प्रश्न उठ्न थालेको छ ।

स्थानीय स्रोतका अनुसार, वीरगंजस्थित ‘फुड गार्डेन’ नामक खाजा होटलमा ग्राहकलाई दिइएको चिकेन ललिपपमा कुखुराको शरीरमा स्पष्ट रूपमा चोट लागेको भाग फेला परेको हो । घटना सार्वजनिक भएसँगै उक्त होटलको खाद्य गुणस्तर, सरसफाइ र तयारी प्रक्रियाबारे व्यापक आलोचना सुरु भएको छ । ग्राहकहरूले यस्तो लापरबाहीले प्रत्यक्ष रूपमा स्वास्थ्यमा असर पार्ने भन्दै सम्बन्धित निकायलाई तत्काल छानबिन गरी दोषीमाथि कारबाही गर्न माग गरेका छन् ।

स्वास्थ्यकर्मीहरूका अनुसार अस्वस्थ वा रोग लागेको कुखुराको मासु सेवन गर्दा संक्रमणजन्य रोगको जोखिम उल्लेखनीय रूपमा बढ्ने सम्भावना रहन्छ । यस प्रकरणले होटल व्यवसायीहरूको जिम्मेवारी र उत्तरदायित्वमाथि पनि गम्भीर प्रश्न खडा गरेको छ । गुणस्तरहीन तथा असुरक्षित खाद्य सामग्री प्रयोग गर्नु उपभोक्ता अधिकारको उल्लंघन भएको भन्दै सरोकारवालाहरूले कडा निगरानी र दण्डात्मक कदम चाल्नुपर्नेमा जोड दिएका छन् ।

उपभोक्ता अधिकारकर्मीहरूले खाद्य प्रविधि तथा गुण नियन्त्रण कार्यालय लगायत सम्बन्धित निकायलाई बजार अनुगमन थप प्रभावकारी बनाउन आग्रह गरेका छन् । दोषी व्यवसायीलाई कानुनी दायरामा ल्याई कडा कारबाही गर्नुपर्ने उनीहरूको माग छ । स्थानीय प्रशासनले समेत घटनालाई गम्भीर रूपमा लिएर आवश्यक अनुसन्धान अघि बढाउनुपर्ने आवश्यकता देखिएको छ । उपभोक्ताको स्वास्थ्यसँग प्रत्यक्ष जोडिएको विषय भएकाले अब ढिलाइ नगरी ठोस र प्रभावकारी कदम चाल्नुपर्ने आवाज चौतर्फी उठ्न थालेको छ ।