वीरगंज (पर्सा), २ चैत । वीरगंजस्थित श्री नेपाल रेलवे माध्यमिक विद्यालय मा सोमबारदेखि दुई दिने वित्तीय साक्षरता (फाइनान्सियल लिटरेसी) सम्बन्धी कार्यक्रम सुरु भएको छ । ग्लोबल मनी वीक को अवसर पारेर ज्योति विकास बैंक वीरगंज शाखाले उक्त कार्यक्रम आयोजना गरेको हो ।
विद्यालयमा आयोजित कार्यक्रममा कक्षा ९ मा अध्ययनरत करिब ६५ जना विद्यार्थी सहभागी छन् । कार्यक्रममा विद्यार्थीहरूलाई आर्थिक ज्ञान, बचत गर्ने बानीको महत्व, बैंकिङ सेवाको प्रयोग तथा डिजिटल बैंकिङका बारेमा जानकारी प्रदान गरिएको छ । प्रशिक्षण सत्रमा बैंकका अधिकारी लक्ष्मण कुमार रौनियार, राहुल बरनवाल र राजा बाबु ले सहजीकरण गरिरहेका छन् ।
कार्यक्रमका क्रममा बोल्दै बैंकका अधिकृत लक्ष्मण कुमार रौनियारले विद्यार्थीहरूलाई सानै उमेरदेखि बचत गर्ने बानी बसाल्नु अत्यन्त आवश्यक रहेको बताए । उनका अनुसार आर्थिक रूपमा सचेत र अनुशासित भए भविष्यमा व्यक्तिगत तथा पारिवारिक जीवन व्यवस्थापन गर्न धेरै सहज हुन्छ । उनले आधुनिक बैंकिङ प्रणाली, डिजिटल कारोबार तथा वित्तीय अनुशासनबारे जानकारी राख्नु आजको समयको महत्वपूर्ण आवश्यकता भएको पनि उल्लेख गरे ।
विद्यालयका प्रिन्सिपल प्रभु प्रसाद रौनियार ले यस्ता कार्यक्रमले विद्यार्थीहरूमा आर्थिक चेतना र वित्तीय व्यवहारबारे सकारात्मक प्रभाव पार्ने विश्वास व्यक्त गरे । उनले कार्यक्रम आयोजना गरेकोमा बैंकप्रति धन्यवादसमेत व्यक्त गरे ।
प्रतिक्रिया दिनुहोस् !