वीरगंज (पर्सा), २ चैत । पर्सा जिल्लामा फागुन महिनामा विभिन्न प्रकारका ८४ वटा अपराधका मुद्दा दर्ता भएका छन् । जिल्ला प्रहरी कार्यालय पर्साले सार्वजनिक गरेको मासिक प्रगति विवरण अनुसार उक्त अवधिमा लागूऔषध नियन्त्रण, अपराध अनुसन्धान तथा शान्ति सुरक्षा व्यवस्थापनमा उल्लेखनीय गतिविधि सञ्चालन गरिएको छ । प्रहरीका अनुसार दर्ता भएका अपराधमध्ये २१ सामाजिक अपराध, १९ संगठित तथा आर्थिक अपराध, १३ ज्यानसम्बन्धी, १० चोरीसम्बन्धी, ८ महिला तथा बालबालिका सम्बन्धी, ६ आत्महत्या, २ सवारी ज्यान र ५ अन्य अपराध रहेका छन् ।
यसैगरि फागुन महिनामा लागूऔषध सम्बन्धी ५ वटा मुद्दा दर्ता भई ५ जना पक्राउ परेका छन् । प्रहरीले विभिन्न स्थानबाट ३४२ किलो गाँजा, ०.२६ ग्राम ब्राउन सुगर तथा ५२ हजार ३०० ट्रामाडोल क्याप्सुल बरामद गरेको जनाएको छ । जिल्ला प्रहरी कार्यालय तथा मातहतबाट ५१ जना फरार प्रतिवादी पक्राउ गरिएको छ । यसैगरी फैसला कार्यान्वयन अभियान अन्तर्गत ४७ जना पक्राउ गरी १२ वर्ष ३ महिना कैद तथा ३ लाख ४८ हजार ४५५ रुपैयाँ जरिवाना असुल गरिएको प्रहरीले जनाएको छ ।
प्रहरी कार्यालयको विवरण अनुसार फागुन महिनामा ४८ वटा घरेलु हिंसाका उजुरी दर्ता भएका छन् । तीमध्ये ४५ वटा मिलापत्रमार्फत टुंग्याइएको छ भने अधिकांश उजुरी वीरगञ्ज महानगरपालिका क्षेत्रबाट आएका छन् । यस अवधिमा ६ वटा झुण्डिएर आत्महत्याका घटना दर्ता भएका छन् । प्रहरीको तथ्यांक अनुसार आत्महत्या गर्नेमा १६–२५ वर्ष उमेर समूहका ५ जना रहेका छन् भने ६० वर्षभन्दा माथिका १ जना छन् ।
यसैगरि फागुन महिनामा पर्सामा ७३ वटा सवारी दुर्घटना भएका छन् । दुर्घटनामा ३ जनाको मृत्यु र २८ जना घाइते भएका छन् । ट्राफिक कारवाहीबाट ९४५ सवारी साधनलाई कारवाही गरी १२ लाख १९ हजार ५०० रुपैयाँ जरिवाना उठाइएको छ । प्रहरीले विभिन्न स्थानबाट ५ करोड ४९ लाख २९ हजार ६१९ रुपैयाँ बराबरका सामान राजश्व चुहावट नियन्त्रणका क्रममा बरामद गरेको जनाएको छ । साथै भन्सार छलीबाट करिब ३ लाख ७९ हजार रुपैयाँ बराबरका सामान बरामद गरिएको छ ।
प्रहरीले लागूऔषध, महिला हिंसा, बालविवाह, ट्राफिक सचेतना लगायतका विषयमा ६३ वटा समुदाय केन्द्रित कार्यक्रम सञ्चालन गरेको छ । ती कार्यक्रममा १ हजार ७५१ जना लाभान्वित भएका छन् । प्रहरीका अनुसार अपराध नियन्त्रणका लागि सिसिटिभी तथा डिजिटल निगरानी, सामुदायिक सचेतना, गस्ती तथा चेकजाँच कडाइ, सूचना संकलन सञ्जाल र वैज्ञानिक अनुसन्धानलाई प्राथमिकता दिइएको छ । प्रहरीले सीमावर्ती जिल्लाको संवेदनशीलतालाई ध्यानमा राख्दै सीमामा चेकजाँच कडाइ, रात्री चेकिङ तथा स्ट्यान्डबाइ टोली परिचालन गरेर शान्ति सुरक्षालाई प्रभावकारी बनाइएको जनाएको छ ।
प्रतिक्रिया दिनुहोस् !