सन्तपुर (रौतहट), २ चैत । रौतहट जिल्लाको फतुवा विजयपुर नगरपालिका–५ सन्तपुरमा दलित समुदायमाथि भएको कुटपिट घटनाबारे छानबिन गर्न राष्ट्रिय दलित आयोगको टोली घटनास्थल पुगेको छ । आयोगले घटनालाई गम्भीर रूपमा लिँदै पीडित परिवारसँग भेटघाट गरी प्रारम्भिक अनुसन्धान सुरु गरेको हो ।
आयोगका सदस्य सुन्दर पुर्कुटीको नेतृत्वमा आएको टोली सोमबार सन्तपुर पुगेर पीडित परिवार र पीडक परिवार सँग छुट्टाछुट्टै भेट गर्दै घटनाबारे विस्तृत जानकारी लिएको छ । टोलीले घटनाको पृष्ठभूमि, पीडितको स्वास्थ्य अवस्था तथा स्थानीय सरोकारवालासँग छलफल गरी आवश्यक तथ्य संकलन गरेको जनाएको छ ।
फागुन १९ गते होली पर्वको पूर्वसन्ध्या तथा प्रतिनिधिसभा निर्वाचन हुनुभन्दा दुई दिनअघि उक्त घटना भएको बताइएको छ । बिर्जा राम चमारले सामान्य विवादपछि स्थानीय भुनेश्वर यादव, पसिन्द्र यादवकोसहितको समूह लाठी–भाटा लिएर साँझ करिब ६ बजे घरमै पसेर कुटपिट गरेको बताएका थिए । उनका अनुसार सो समूहले घरभित्र रहेका श्रीमती, छोरीसहित ६ जनामाथि निर्घात कुटपिट गर्नुका साथै घरका सामान तोडफोड गरेको थियो । घरमा रहेका दुईवटा मोबाइलसमेत फोडिएको उनले बताए ।
कुटपिटबाट बिर्जा राम चमारको ढाड र घाँटीमा चोट लागेको छ भने उनकी श्रीमती गायत्री देवी रामको शरीरभरि निलडाम परेको देखिएको छ । त्यस्तै उनका छोरा राजकुमार रामको टाउकोमा तीन टाँका लागेको छ भने सुब्बा रामकी १६ वर्षीया छोरीको टाउको फुटेर सात टाँका लागेको छ । ललन राम चमारको अनुहार र शरीरमा चोटपटक लागेको छ भने नरेश राम चमारको टाउको र आँखामा चोट लागेको पीडित पक्षले जनाएको छ । पीडित बिर्जा राम चमारको उजुरीका आधारमा रौतहट जिल्ला प्रहरी कार्यालयका प्रमुख एसपी सिताराम रिजालको निर्देशनपछि इलाका प्रहरी कार्यालय विजयपुर लक्ष्मिनियामा बुधबार उक्त मुद्दा दर्ता गरिएको हो ।
घटनामा संलग्न भनिएका पसिन्द्र यादवलाई प्रहरीले पक्राउ गरेको छ । अन्य आरोपीहरू भुनेश्वर यादव, नितेश यादव, जगु यादव (नगेन्द्र यादव), सुखारी यादव, गिरधारी यादव, नबिन कुमार यादव र जयप्रकाश यादव भने फरार रहेको र उनीहरूको खोजी भइरहेको प्रहरीले जनाएको छ । हाल सम्म पीडित परिवारलाई डर त्रास भइरहेको पीडित परिवारले बताएका हुन । पीडित परिवारसँग कुराकानी गर्दै आयोगका सदस्य पुर्कुटीले जातीय आधारमा हुने हिंसा कानुनविपरीत गम्भीर अपराध भएको उल्लेख गर्दै यस्ता घटनाप्रति राज्य संवेदनशील हुनुपर्ने बताए । उनले घटनाको निष्पक्ष छानबिन गरी दोषीलाई कानुनी कारबाही गराउने र पीडितलाई न्याय दिलाउन आयोगले आवश्यक पहल गर्ने प्रतिबद्धता व्यक्त गरे ।
घटनास्थल अवलोकनका क्रममा पूर्व मन्त्री विश्वेन्द्र पासवान, फतूवा विजयपुर नगरपालिकाका मेयर प्रत्यासी विजय यादव निर्बिज, दलित नेता राजेश निर्मानी, ईलाका प्रहरी कार्यलय विजयपुरका प्रमुख , सशस्त्र प्रहरी प्रमुख लगायत दलित अभियन्ता लगायत स्थानीय सरोकारवालाको उपस्थिति रहेको थियो । आयोगको टोलीले यसैक्रममा स्थानीय जनप्रतिनिधिसँग पनि भेटेर घटनाको अवस्था तथा शान्ति सुरक्षाबारे जानकारी लिएको जनाएको छ ।
प्रतिक्रिया दिनुहोस् !