वीरगंज (पर्सा), २ चैत । राष्ट्रिय दलित आयोगका सदस्य सुन्दर पुर्कुटीले दलित समुदायसँग जोडिएका घटनालाई गम्भीरतापूर्वक लिँदै प्रशासनले प्राथमिकताका साथ काम गर्नुपर्ने बताएका छन् । सोमबार बिहान पर्साको जिल्ला प्रशासन कार्यालयमा भएको छलफलका क्रममा उनले दलित समुदायका मुद्दा समाधानमा संवेदनशीलता र शीघ्र न्याय सुनिश्चित गर्न आग्रह गरेका हुन् । छलफलमा पर्साका प्रमुख जिल्ला अधिकारी भोला दाहाल तथा जिल्ला प्रहरी प्रमुख सुदिपराज पाठक सहितका अधिकारीहरू सहभागी थिए । सो अवसरमा पुर्कुटीले पर्साको सखुवाप्रसौनी गाउँपालिका–५ महुवनमा हालै भएको कुटपिट घटनाको निष्पक्ष छानबिन गरी पीडितलाई न्याय दिलाउन प्रशासनसँग आग्रह गरे ।
उनले नेपालको संविधानले दलित समुदायका अधिकारलाई स्पष्ट रूपमा सुनिश्चित गरेको उल्लेख गर्दै ती अधिकार व्यवहारिक रूपमा कार्यान्वयन भए नागरिकले न्यायका लागि भौतारिनुपर्ने अवस्था नआउने बताए । जातीय विभेदसँग जोडिएका घटनामा कुनैपनि प्रकारको सम्झौता अस्वीकार्य हुने उनको भनाइ थियो । ‘यदि जातीय आधारमा घटना भएको पुष्टि हुन्छ भने दोषीलाई कानुनअनुसार कडा कारबाही हुनुपर्छ । यस्तो विषयमा राजनीतिक दबाब वा हस्तक्षेप स्वीकार्य हुँदैन,’ उनले स्पष्ट पारे । यसैबीच प्रमुख जिल्ला अधिकारी दाहालले कानुन सबै नागरिकका लागि समान रहेको बताउँदै प्रशासनले कसैलाई पनि पक्षपात नगर्ने उल्लेख गरे ।
दलित समुदायसँग सम्बन्धित विषयलाई प्रहरी र प्रशासनले संवेदनशील ढंगले हेर्ने गरेको भन्दै उनले सबै सेवाग्राहीलाई समान व्यवहार र सेवा उपलब्ध गराउने प्रतिबद्धता जनाए । जिल्ला प्रहरी कार्यालय पर्साका प्रमुख एसपी पाठकले पनि उक्त घटनाको अनुसन्धानलाई गम्भीरताका साथ अघि बढाइएको जानकारी दिए । उनका अनुसार कहिलेकाहीँ राजनीतिक स्वार्थका कारण घटनालाई जातीय रंग दिन खोज्ने प्रवृत्ति देखिने भएकाले तथ्यमा आधारित अनुसन्धान आवश्यक हुन्छ ।
महुवन घटनामा प्रहरीले उजुरी दर्ता गरिसकेको र घाउजाँच (केस फारम) समेत तयार गरिएको उनले बताए । ‘अनुसन्धान प्रक्रियालाई छिटो टुंग्याएर दोषीलाई कारबाही र पीडितलाई न्याय दिलाइनेछ,’ उनले भने । सो छलफलमा सहायक प्रमुख जिल्ला अधिकारी विनोद कुमार पोखरेल, दलित समुदायका अगुवा अशोक राउत, मानदेव हजरा, लबकुश बैठा, मनोज राम, सुरेन्द्र पासवान, उर्मिला महतो लगायतको उपस्थिति रहेको थियो ।
यसअघि आयोगको टोली महुवन पुगेर घटनामा घाइते भएका व्यक्तिहरूसँग भेटघाट गरेको थियो । पुर्कुटीको नेतृत्वमा पुगेको टोलीले घटनास्थलमै पुगेर पीडित परिवारसँग कुराकानी गर्दै घटनाको वास्तविकता बुझ्ने प्रयास गरेको हो । गत फागुन २४ गते साँझ महुवन बजार क्षेत्रमा केही गैरदलित व्यक्तिहरूले दलित समुदायका सदस्यहरूमाथि कुटपिट गरेको आरोप छ । उक्त घटनामा स्थानीय मालती देवी राम र उनका ७ वर्षीय भतिज बब्लु कुमार राम घाइते भएका छन् । बब्लुको बायाँ हात भाँचिएको छ भने मालती देवी रामको टाउकोमा चोट लागेर तीन वटा टाँका लगाइएको बताइएको छ ।
घटनाको यथार्थ पत्ता लगाएर पीडितलाई न्याय दिलाउन आयोगले पहल गर्ने जनाएको छ । टोलीले सोही क्रममा वडा नं. ५ का वडाध्यक्ष यशेश्वर प्रसाद यादव सँग पनि छलफल गरेको थियो । भेटघाटका क्रममा पुर्कुटीले जातीय आधारमा हुने हिंसा कानुनी अपराध भएको स्पष्ट पार्दै दलित समुदायमाथि हुने यस्ता घटनालाई कुनै पनि हालतमा सहन नसकिने बताए। कार्यक्रममा मधेश प्रदेशका पूर्व प्रदेशसभा सदस्य सुन्दर विश्वकर्मा, दलित अगुवा मानदेव हजरा, सुरेन्द्र पासवान लगायतको पनि उपस्थिति रहेको थियो ।
प्रतिक्रिया दिनुहोस् !