कलैया (पर्सा), १ चैत । बारा उद्योग वाणिज्य संघ, कलैयाले बजारमा खाना पकाउने एलपी ग्यासको कृत्रिम अभाव सिर्जना नगर्न ग्यासका थोक तथा खुद्रा व्यवसायीलाई निर्देशन दिएको छ । पछिल्लो समय ग्यास आपूर्ति सम्बन्धी अफवाह फैलिँदा उपभोक्तामा अन्योल बढेको भन्दै संघले व्यवसायीलाई जिम्मेवार ढंगले व्यापार सञ्चालन गर्न आग्रह गरेको हो ।
शनिबार कलैयामा आयोजित व्यवसायीसँगको बैठकमा संघका पदाधिकारीहरूले बजार व्यवस्थापन व्यवस्थित बनाउन र उपभोक्ताको हित सुरक्षित राख्न पारदर्शी ढंगले कारोबार गर्नुपर्नेमा जोड दिएका छन् । बैठकमा नयाँ सिलिन्डर बिक्री नगर्न, सरकारले तोकेको मूल्यभन्दा बढी नलिन तथा ग्यास लुकाउने वा आपूर्ति अवरुद्ध नगर्न व्यवसायीलाई निर्देशन दिइएको छ ।
उपभोक्तालाई ग्यास सिलिन्डर ९ सय ५५ रुपैयाँमै उपलब्ध गराउन पनि सम्झाइ गरिएको छ । त्यसैगरी फरक कम्पनीको ग्यास सिलिन्डर लिएर आउने उपभोक्तालाई समस्या नपार्न र आवश्यक परे वैकल्पिक व्यवस्थामार्फत सेवा उपलब्ध गराउन पनि आग्रह गरिएको छ । बजारमा अफवाह फैलाउने कार्य नगर्न संघले व्यवसायीलाई सचेत गराएको छ ।
बैठकमा संघका अध्यक्ष राजकुमार साह, उपाध्यक्ष प्रदीप कुमार साह, महासचिव रामअशिष साह, कोषाध्यक्ष अजय साह लगायत विभिन्न ग्यास कम्पनीका थोक तथा खुद्रा व्यवसायीको सहभागिता रहेको थियो । संघले ग्यास आपूर्ति सहज बनाउन व्यवसायी, आपूर्तिकर्ता र सम्बन्धित निकायबीच समन्वयलाई निरन्तरता दिने जनाएको छ ।
प्रतिक्रिया दिनुहोस् !