वीरगंज (पर्सा), १ चैत । वाणिज्य, आपूर्ति तथा उपभोक्ता संरक्षण कार्यालयले उपभोक्ता तथा व्यवसायीलाई उपभोग्य वस्तुको खरिद–बिक्री गर्दा आवश्यक सावधानी अपनाउन आग्रह गरेको छ । कार्यालय प्रमुख शुशिल साहले उपभोक्तालाई सामान खरिद गर्दा कारोबारस्थलमा साइनबोर्ड र मूल्यसूची भए–नभएको हेर्न तथा प्याकिङ गरिएका वस्तुमा उत्पादकको नाम, ठेगाना, ब्याच नम्बर, तौल, उत्पादन मिति, उपभोग मिति र अधिकतम खुद्रा मूल्य उल्लेख भए–नभएको जाँच गर्न आग्रह गरेका छन् ।
त्यसैगरी उत्पादन वा उपभोग मिति नभएको, केरमेट गरिएको वा पुनः लेबलिङ गरिएको वस्तु खरिद नगर्न पनि उपभोक्तालाई सचेत गराइएको छ । औषधि तथा औषधिजन्य सामग्री खरिद गर्दा प्याकिङमा उपभोग मिति र प्रयोग गर्ने तरिका स्पष्ट रूपमा उल्लेख भए–नभएको हेर्नुपर्ने कार्यालयले जनाएको छ ।
कार्यालयका अनुसार वस्तु तथा सेवा खरिद गर्दा बिल लिनु उपभोक्ताको अधिकार भएकाले अनिवार्य रूपमा बिल लिनुपर्नेछ । कमसल वा अखाद्य वस्तु बिक्री भएको पाइएमा स्थानीय तह, प्रहरी कार्यालय, जिल्ला प्रशासन कार्यालय वा सम्बन्धित निकायमा उजुरी दिन पनि आग्रह गरिएको छ ।
यसैबीच कार्यालयले उत्पादक तथा विक्रेतालाई सम्बन्धित निकायमा व्यवसाय दर्ता गरेर मात्र कारोबार सञ्चालन गर्न निर्देशन दिएको छ । उत्पादित वस्तुको लेबलमा उत्पादकको नाम, ठेगाना, उद्योग दर्ता नम्बर, प्रयोग भएका तत्व, तौल, गुणस्तर चिन्ह, अधिकतम खुद्रा मूल्य, ब्याच नम्बर, उत्पादन तथा उपभोग मिति लगायतका विवरण अनिवार्य रूपमा उल्लेख गर्नुपर्ने जनाएको छ ।
त्यसैगरी इलेक्ट्रोनिक तथा यान्त्रिक सामग्रीमा वारेन्टी–ग्यारेन्टीको शर्त स्पष्ट उल्लेख गर्नुपर्ने तथा सेवा प्रदायकले सेवा शुल्क, समय र तरिका स्पष्ट जानकारी गराउनुपर्ने पनि कार्यालयले जनाएको छ । उपभोक्ता संरक्षण ऐन २०७५ बमोजिम लेबलिङ सम्बन्धी विवरण नउल्लेख गर्ने, कृत्रिम अभाव सिर्जना गर्ने वा उपभोक्ताको स्वास्थ्यमा असर पर्ने वस्तु उत्पादन तथा बिक्री–वितरण गर्ने व्यक्तिलाई पाँच वर्षसम्म कैद वा छ लाख रुपैयाँसम्म जरिवाना वा दुवै सजाय हुन सक्ने चेतावनी कार्यालयले दिएको छ ।
कार्यक्रममा जिल्ला प्रशासन कार्यालय पर्साका सहायक प्रमुख जिल्ला अधिकारी, जिल्ला प्रहरी कार्यालयका डीएसपी विनोद कुमार पोखरेल तथा विभिन्न सरोकारवाला व्यक्तिहरूको उपस्थिति रहेको थियो ।
प्रतिक्रिया दिनुहोस् !