वीरगंज (पर्सा), १ चैत । मनोज चौधरीलाई लक्षित गर्दै उनलाई फसाउने प्रयास भएको भन्दै पर्सामा जनस्तरबाट आवाज उठ्न थालेको छ । नेपाल कम्युनिस्ट पार्टी (नेकपा) का नेता तथा पर्सा क्षेत्र नम्बर–२ बाट प्रतिनिधिसभा सदस्यका उम्मेदवार रहेका चौधरीलाई पक्राउ गरिएको घटनाले राजनीतिक तथा सामाजिक वृत्तमा चर्चा र विवाद दुवै बढाएको छ ।
निर्वाचनअघि उनी सवार गाडीबाट शंकास्पद वस्तु फेला परेको आरोपमा प्रहरीले नियन्त्रणमा लिएका चौधरी हाल १३ दिनदेखि जिल्ला प्रहरी कार्यालय पर्सा को हिरासतमा छन् । प्रहरीले गत फागुन २१ गते सम्पन्न प्रतिनिधिसभा निर्वाचनभन्दा दुई दिनअघि चौधरी सवार गाडीबाट शंकास्पद वस्तु भेटिएको भन्दै अनुसन्धानका लागि नियन्त्रणमा लिएको थियो । तर यति लामो समयसम्म अनुसन्धानकै नाममा हिरासतमा राखिएको भन्दै विभिन्न क्षेत्रबाट निष्पक्ष छानबिनको माग उठ्न थालेको छ ।
वीरगंजका अधिवक्ता सुरेन्द्र कुर्मीले चौधरी बम बनाउने वा विस्फोट गराउने प्रवृत्तिका व्यक्ति नभएको दाबी गरेका छन् । उनले सामाजिक सञ्जालमार्फत प्रतिक्रिया दिँदै चौधरी लामो समयदेखि विद्यार्थी राजनीतिबाट उदाएका नेता भएको र उनीजस्ता व्यक्तिले आफ्नै गाडीमा बम राखेर हिँड्न नसक्ने बताएका छन् । जो जनता समाजवादी पार्टी नेपालका केन्द्रीय सदस्य पनि हुन्, उनले घटनामा षड्यन्त्रको सम्भावना रहेको उल्लेख गर्दै निष्पक्ष र पारदर्शी अनुसन्धान गर्न माग गरेका छन् ।
यस्तै नेपाली कांग्रेसका युवा नेता राकेश यादवले पनि सामाजिक सञ्जालमार्फत प्रतिक्रिया दिँदै चौधरीलाई आफूले विद्यार्थी नेताका रूपमा चिन्ने गरेको बताएका छन् । उनका अनुसार चौधरी बम बोकेर हिँड्ने व्यक्तित्व नभएकाले घटनाबारे राज्यले छिटो सत्यतथ्य सार्वजनिक गर्नुपर्छ । त्यसैगरी नेपाली कांग्रेस पर्साका सह–सचिव नविन सिंहले पनि विद्यार्थी जीवनदेखि राजनीतिमा सक्रिय चौधरीलाई तत्काल रिहा गर्न माग गरेका छन् ।
प्रहरी कारबाहीमाथि प्रश्न
पर्साका केही युवाहरूले समेत चौधरीलाई फसाउने योजनाबद्ध प्रयास भएको आशंका व्यक्त गरेका छन् । १३ दिनसम्म हिरासतमा राखेर अनुसन्धान भइरहेको भन्दै प्रहरीको कार्यशैलीमाथि प्रश्न उठ्न थालेको छ । यसअघि नेकपा पर्साका नेताहरूले पनि आफ्ना उम्मेदवारलाई योजनाबद्ध रूपमा फसाउने प्रयास भएको आरोप लगाउँदै निष्पक्ष छानबिनको माग गरेका थिए ।
चौधरीका परिवारजनले भने चुनावी समयमा उनको ज्यान लिन सक्ने षड्यन्त्र भएको दाबी गर्दै प्रहरीले उल्टै उनलाई हिरासतमा राखेर दुःख दिएको आरोप लगाएका छन् । प्रहरीले घटनासँग सम्बन्धित भन्दै चार जनालाई नियन्त्रणमा राखेको जनाएको छ । वीरगंज महानगरपालिका–१७ निवासी मनोज चौधरी, पर्सागढी नगरपालिका–३ निवासी सत्यनारायण थारु, बारा प्रसौनी गाउँपालिका–४ निवासी चालक सहाब आलम अन्सारी र धनुषा धनुषाधाम नगरपालिका–९ निवासी सुरज कार्की प्रहरी हिरासतमा छन् ।
परिवारजनका अनुसार सुरज कार्की शंकास्पद वस्तु फेला परेको गाडीमा नभई अर्को गाडीमा सवार रहेपनि प्रहरीले उनलाई सोही गाडीमा सवार देखाएर नियन्त्रणमा लिएको आरोप लगाइएको छ । यता नेपाल प्रहरीले भने घटनाबारे अनुसन्धान अझै जारी रहेको जनाएको छ ।
प्रतिक्रिया दिनुहोस् !