वीरगंज (पर्सा), ३० फागुन । पर्सा जिल्लाको ठोरी गाउँपालिका लगायत सो आसपासको क्षेत्रमा लगातार दुइ साँझ परेको असिना पानिले गहुँबालीमा क्षति पुर्याएको छ ।
विहीवार र शुक्रवार साँझ ठोरी गाउँपालिका हुँदै जंगल आसपासको क्षेत्रमा हुरी बताससंगै असिना पानी परेको थियो । हुरी बतासले गहुँबाली लतार्नुका साथै असिनाले पाक्न लागेको गहुँको बाला छियाछिया पारेर नोक्सान पुर्याएको स्थानीय कृषकहरूले दुखेसो पोखेका छन् ।
यसैगरि टिपेर राखेको सुर्तीमा समेत पानीले क्षति पुर्याएको ठोरी–४ विजयबस्तीका कृषकहरूले बताएका छन् । हुरी बतास र असिना पानी पर्ला भन्ने संका नै नगरेको बेला अकस्मात परेकोले सुर्तिमा क्षति बढि भएको उनीहरूको भनाई छ ।
पर्साको वीरगंजदेखि जीराभवानी पालिकासम्मको क्षेत्रमा सामान्य बर्षा भएको भएता पनि ठोरी देखि चितवनको नारायण घाट र मकवानपुरको चुरे क्षेत्रसम्म बाक्लो असिना पानी परेको सो क्षेत्रका बासिन्दाले जानकारी गराएका छन् ।
प्रतिक्रिया दिनुहोस् !