बरहथवा (सर्लाही), २५ फागुन । प्रतिनिधिसभा सदस्य निर्वाचन अन्तर्गत सर्लाही जिल्लाका चारवटै निर्वाचन क्षेत्रबाट प्रतिस्पर्धा गरेका पूर्वमन्त्री, निवर्तमान सांसद तथा स्वतन्त्र उम्मेदवारसहित कुल १५४ जनाको जमानत जफत हुने अवस्था देखिएको छ । निर्वाचन कानुनअनुसार कुल सदर मतको कम्तीमा १० प्रतिशत मत प्राप्त गर्न नसक्ने उम्मेदवारको जमानत जफत हुने प्रावधान रहेको छ ।
मुख्य निर्वाचन अधिकृत पुष्पराज थपलियाका अनुसार सम्पन्न निर्वाचनमा ६८ स्वतन्त्रसहित १५४ जना उम्मेदवारले आवश्यक मत हासिल गर्न नसकेपछि उनीहरूको जमानत जफत हुने भएको हो । जमानत गुमाउने सूचीमा पूर्वमन्त्रीदेखि निवर्तमान प्रतिनिधिसभा सदस्यसम्म परेका छन् ।
सर्लाही–१ : २८ उम्मेदवारको जमानत जफत
सर्लाही क्षेत्र नम्बर १ मा नेपाली कांग्रेसका उम्मेदवार शम्भुलाल श्रेष्ठ बाहेक अधिकांश उम्मेदवारले जमानत जोगाउन सकेनन् । यस क्षेत्रमा जमानत सुरक्षित गर्न कम्तीमा ७ हजार ३८५ मत आवश्यक थियो । तर दुई जनाबाहेक अन्य उम्मेदवारले यो सीमा पार गर्न सकेनन् ।
जनता समाजवादी पार्टीका उम्मेदवार तथा निवर्तमान सांसद रामप्रकाश चौधरी, पूर्व सांसद प्रमोद साह तथा ईश्वरपुर नगरपालिकाका पूर्व मेयर मनोजकुमार देवकोटा सहित २८ जनाको जमानत जफत भएको छ ।
चौधरीले ३ हजार ९९१ मत प्राप्त गरेका छन् भने साहले ५ हजार ४९८ मत, देवकोटाले ६ हजार १०१ मत प्राप्त गरेका छन् । कुल १ लाख ३० हजार ८७१ मतदाता रहेको क्षेत्रमा ७९ हजार २०७ मत खसेको थियो, जसमध्ये ७३ हजार ८४२ मत सदर भएको थियो ।
सर्लाही–२ : राजेन्द्र महतोसहित २९ जनाको जमानत जफत
सर्लाही क्षेत्र नम्बर २ मा राष्ट्रिय मुक्ति पार्टी नेपालका अध्यक्ष तथा पूर्व उपप्रधानमन्त्री राजेन्द्र महतो सहित २९ उम्मेदवारले जमानत गुमाएका छन् । तीमध्ये १७ जना स्वतन्त्र उम्मेदवार रहेका छन् । यस क्षेत्रमा जमानत जोगाउन ७ हजार २३९ मत आवश्यक थियो । तर महतोले ५ हजार ९९२ मत मात्र प्राप्त गरेपछि उनको जमानत जफत भएको हो ।
यसै क्षेत्रमा पूर्वमन्त्री महेन्द्रराय यादव भने ८ हजार ५२३ मत ल्याउँदै जमानत सुरक्षित गर्न सफल भए । कुल १ लाख २५ हजार ३११ मतदाता रहेको क्षेत्रमा ७७ हजार ७८९ मत खसेको थियो । त्यसमध्ये ७२ हजार ३८१ मत सदर र ५ हजार ८ मत बदर भएको थियो ।
सर्लाही–३ : नारायणकाजी श्रेष्ठ मात्र जमानत जोगाउन सफल
सर्लाही क्षेत्र नम्बर ३ मा ३४ जना उम्मेदवार मैदानमा उत्रिएका थिए । तीमध्ये पूर्व गृहमन्त्री नारायणकाजी श्रेष्ठ बाहेक अन्य अधिकांश उम्मेदवारले जमानत जोगाउन सकेनन् । निर्वाचन अधिकृत नवराज आचार्यका अनुसार १९ स्वतन्त्रसहित ३२ उम्मेदवारले आवश्यक मत नल्याउँदा जमानत जफत हुने भएको छ ।
जमानत सुरक्षित गर्न ७ हजार ७८४ मत आवश्यक थियो भने श्रेष्ठले १३ हजार ३३८ मत प्राप्त गरेका छन् । यस क्षेत्रमा पूर्व रक्षामन्त्री तथा निवर्तमान सांसद हरिप्रसाद उप्रेती र नेपाली कांग्रेसका विनोदकुमार खनाल लगायतका उम्मेदवारको जमानत जफत भएको छ ।
सर्लाही–४ : गगन थापा र एमालेका यादवले मात्र जोगाए जमानत
सर्लाही क्षेत्र नम्बर ४ मा नेपाली कांग्रेसका सभापति गगनकुमार थापा र नेकपा एमालेका उम्मेदवार अमनिसकुमार यादव बाहेक अन्य सबै उम्मेदवारको जमानत जफत भएको छ । ३८ जना उम्मेदवार रहेको यस क्षेत्रमा २३ स्वतन्त्रसहित ३५ जनाले जमानत जोगाउन सकेनन् । जमानत सुरक्षित गर्न आवश्यक ७ हजार ३३७ मत धेरै उम्मेदवारले ल्याउन सकेनन् ।
यस क्षेत्रमा राष्ट्रिय स्वतन्त्र पार्टीका अमरेशकुमार सिंह ३५ हजार ६८८ मतसहित विजयी भएका छन् । गगन थापाले २२ हजार ८३१ मत प्राप्त गरेका छन् भने अमनिसकुमार यादवले ९ हजार ३४३ मत प्राप्त गरेका छन् । कुल १ लाख २१ हजार १२ मतदाता रहेको क्षेत्रमा ७७ हजार ९३१ मत खसेको थियो । त्यसमध्ये ७३ हजार ३६२ मत सदर र ४ हजार ५६९ मत बदर भएको थियो ।
प्रतिनिधिसभा सदस्य निर्वाचनको प्रत्यक्षतर्फ कुल सदर मतको १० प्रतिशतभन्दा कम मत प्राप्त गर्ने उम्मेदवारको जमानत जफत हुने कानुनी प्रावधान रहेको छ । उम्मेदवारले मनोनयन दर्ता गर्दा बुझाएको उक्त रकम राज्यकोषमा जाने व्यवस्था निर्वाचन आयोगले स्पष्ट पारेको छ । यस पटक जिल्लाका चारवटै क्षेत्रमा विजयी उम्मेदवारहरूले उच्च मत ल्याएपछि जमानत गुमाउने उम्मेदवारको संख्या उल्लेख्य रूपमा बढेको देखिएको छ ।
प्रतिक्रिया दिनुहोस् !