गादीमाई साझेदारी वनमा विवाद, अध्यक्षको राजीनामा माग्दै वन कार्यालय घेराउ

वीरगंज (पर्सा), २४ फागुन । पर्साको जिराभवानी गाउँपालिका क्षेत्रस्थित गादीमाई साझेदारी वन उपभोक्ता समूह का अध्यक्ष सहरुम राउत गद्दीको राजीनामा माग गर्दै स्थानीय बासिन्दाले आइतबार बसन्तपुरस्थित वन कार्यालयमा विरोध प्रदर्शन गरेका छन् । आक्रोशित नागरिकहरूले बसन्तपुर सब–डिभिजन वन कार्यालय घेराउ गर्नुका साथै उपभोक्ता समूहको कार्यालयमा तालाबन्दी गरेका हुन् ।

आइतबार दिउँसो करिब २ बजेदेखि सुरु भएको विरोध कार्यक्रममा जिराभवानी गाउँपालिका अन्तर्गत पर्ने सेढवा, बसन्तपुर, काठमाडौंटोल, भवानीपुर, महादेवपट्टी, हरैया र सुपौलीलगायत गाउँका स्थानीय सहभागी भएका थिए । उनीहरूले वन कार्यालयअगाडि नाराबाजी गर्दै अध्यक्ष गद्दीविरुद्ध कारबाहीको माग गरेका छन् । स्थानीयका अनुसार दाउरा, घाँस तथा घर लिपपोतका लागि आवश्यक माटो लिन वन क्षेत्रमा जाँदा वा पशु चौपायालाई गोठालो लैजाँदा समूहका अध्यक्ष सहरुम राउत गद्दी तथा कार्यालय सहयोगी सोयालाल साह रौनियार र समिन गद्दीले दुर्व्यवहार गर्ने गरेको गुनासो गरेका छन् ।

उनीहरूले अभद्र व्यवहार गर्नुका साथै अश्लील शब्द प्रयोग गरी गालीगलौज गर्ने गरेको स्थानीयले आरोप लगाएका छन् । सरोज चौरसियाको नेतृत्वमा गरिएको आन्दोलनका क्रममा प्रदर्शनकारीहरू कार्यालय पुगेका बेला समूहका अध्यक्षसहित अन्य पदाधिकारी भने कार्यालयमा उपस्थित नभएको बताइएको छ । प्रदर्शनको स्थिति नियन्त्रणमा राख्न इलाका प्रहरी कार्यालय पटेर्वासुगौली, प्रहरी चौकी हरैया तथा शस्त्र प्रहरी बल नेपाल अन्तर्गत सुवर्णपुर बेस क्याम्पबाट सुरक्षाकर्मी परिचालन गरिएको थियो ।

आन्दोलनका क्रममा स्थानीयले वन व्यवस्थापनसँग सम्बन्धित गम्भीर आरोपसमेत लगाएका छन् । कार्यपालिका सदस्य चौरसियाका अनुसार डिभिजन वन कार्यालय पर्साका प्रमुख मन्जुर अहमद र समूहका अध्यक्ष गद्दीबीचको मिलेमतोमा लामो समयदेखि राष्ट्रिय वनबाट अवैध काठ तस्करी भइरहेको स्थानीयको दाबी छ ।

यसैबीच गत फागुन १४ गते साँझ करिब ७ बजे तस्करीको काठ बोकेको एउटा ट्याक्टर नियन्त्रणमा लिइएको घटना पनि सार्वजनिक भएको छ । प्र २–०३–००१ त ३८०० नम्बरको उक्त ट्याक्टर सहजानपुर क्षेत्रबाट सतिसाल र सिसौ जातका काठसहित पक्राउ गरिएको थियो । उक्त ट्याक्टरलाई प्रहरी चौकी हरैयामा बुझाइएको बताइएको छ ।

बसन्तपुर सब–डिभिजन वन कार्यालयका प्रमुख वन अधिकृत मोवारक अलीका अनुसार जंगलमा छपान गरिएका काठ नै उपभोक्ता समितिका अध्यक्ष तथा अन्य पदाधिकारीहरूले अवैध रूपमा काटेर बिक्री गरेको आशंका गरिएको छ । यस विषयमा कारबाहीका लागि पटक पटक डिभिजन वन कार्यालयमा पत्राचार गरिएको भए पनि हालसम्म कुनै ठोस कदम नचालिएको उनले बताए ।

यता डिभिजन वन कार्यालय पर्साका प्रमुख डिभिजनल वन अधिकृत मन्जुर अहमदले भने घटनासम्बन्धी विषयमा अनुसन्धान भइरहेको प्रतिक्रिया दिएका छन् ।