वीरगंज (पर्सा), १५ फागुन । आगामी फागुन २१ गते तय भएको प्रतिनिधिसभा सदस्य निर्वाचनलाई लक्षित गर्दै जनता समाजवादी पार्टीले वीरगंजमा शक्ति प्रदर्शन गरेको छ । निर्वाचन प्रचारप्रसार अभियानअन्तर्गत पर्सा क्षेत्र नं. २ का प्रतिनिधिसभा सदस्य उम्मेदवार अशोक टेमानीको समर्थनमा पार्टीले भव्य र्याली निकालेको हो ।
हजारौं नेताकार्यकर्ता तथा समर्थकहरूको उल्लेखनीय सहभागितामा वीरगंजको घण्टाघरबाट सुरु भएको र्याली नगरका मुख्य क्षेत्रहरू परिक्रमा गर्दै अघि बढेको थियो । र्याली माइस्थान, आदर्शनगर र कैलाश चोक हुँदै नगर परिक्रमा गर्दै माइस्थान स्थित गहमाई मन्दिर प्राङ्गणमा पुगेर समापन सभामा परिणत भएको थियो । र्यालीका क्रममा सहभागीहरूले पार्टीका झण्डा र नारासहित उत्साहपूर्ण उपस्थिती जनाएका थिए, जसले चुनावी माहोललाई थप तातेको देखिएको थियो ।
समापन सभालाई सम्बोधन गर्दै वक्ताहरूले मधेशसहित पर्सा जिल्लाको समग्र विकासका लागि जसपानै उपयुक्त विकल्प भएको दाबी गरेका थिए । उनीहरूले विगतका वर्षहरूमा देखिएका राजनीतिक अस्थिरता, विकासमा देखिएको सुस्तता र जनअपेक्षा पूरा हुन नसकेको अवस्थालाई अन्त्य गर्न सशक्त नेतृत्व आवश्यक रहेको धारणा राखेका थिए । आगामी निर्वाचनमा पार्टीका उम्मेदवारहरूलाई अत्यधिक मतले विजयी गराउन मतदातासँग अपिल गरिएको थियो । 
कार्यक्रममा जनता समाजवादी पार्टी (जसपा) बाट पर्सा क्षेत्र नं. २ का उम्मेदवार अशोक टेमानीले फागुन २१ गते हुने निर्वाचनलाई लोकतान्त्रिक पर्वका रूपमा उत्साहपूर्वक सम्पन्न गर्न सबैसँग आग्रह गरे । उनले मतदातालाई उम्मेदवारको पृष्ठभूमि, क्षमता र दृष्टिकोण बुझेर मात्र मतदान गर्न सुझाव दिए । ‘यो निर्वाचन केवल प्रतिनिधि छनोट गर्ने प्रक्रिया मात्र होइन, देशको भविष्य निर्धारण गर्ने अवसर पनि हो,’ उनले भने । टेमानीले मतदातालाई कुनै दबाब, प्रभाव वा लोभलालचमा नपरी स्वतन्त्र रूपमा आफ्नो अमूल्य मत प्रयोग गर्न आह्वान गरे । सक्षम, इमानदार र परिणाममुखी नेतृत्व चयन भए मात्र देशमा सुशासन र समृद्धि सम्भव हुने उनको भनाइ थियो ।
उनले पाँच वर्षमा हुनुपर्ने निर्वाचन तीन वर्षमै हुन लागेको प्रसङ्ग उल्लेख गर्दै पछिल्लो राजनीतिक घटनाक्रम र जनआन्दोलनले देशको सत्ता समीकरण परिवर्तन गरेको बताए । देशमा मौलाएको बेथिति र भ्रष्टाचारका कारण जनस्तरमा असन्तोष बढेको र त्यसकै परिणामस्वरूप परिवर्तनको माग तीव्र बनेको उनले उल्लेख गरे । उम्मेदवार टेमानीले परिवर्तनको यो अवसरलाई सही दिशामा उपयोग गर्न आवश्यक रहेको धारणा राख्दै समस्याको जरा पहिचान गरी समाधान गर्न सक्ने नेतृत्व रोज्न मतदातालाई आग्रह गरे ।
मधेशको अधिकार, समावेशी विकास, रोजगारी सिर्जना र आधारभूत पूर्वाधार विस्तारलाई आफ्नो प्रमुख एजेन्डा बनाएको उल्लेख गर्दै उनले पर्सा क्षेत्र नं. २ लाई विकासको नयाँ उचाइमा पुर्याउने प्रतिबद्धता जनाए । वीरगंजमा भएको यो शक्ति प्रदर्शनले पर्सा क्षेत्र नं. २ मा जसपाको चुनावी सक्रियता र जनसमर्थनलाई बलियो सन्देश दिएको विश्लेषण गरिएको छ । पार्टीले आगामी दिनहरूमा पनि घरदैलो, कोर्नर सभा र जनसंवाद कार्यक्रमलाई निरन्तरता दिने जनाएको छ ।
प्रतिक्रिया दिनुहोस् !