वीरगंज (पर्सा), १५ फागुन । पर्सा निर्वाचन क्षेत्र नं. १ मा जनमत पार्टीका प्रतिनिधिसभा सदस्य उम्मेदवार ओमप्रकाश सरार्फले आफ्नो घरदैलो अभियानलाई तीव्रता दिँदै वीरगंज महानगरपालिका–१२ र १३ अन्तर्गत मुर्ली टोलका मतदातासँग प्रत्यक्ष भेटघाट तथा अन्तरक्रिया गरेका छन् । चुनावी कार्यक्रमअन्तर्गत घरघरमा पुगेर सरार्फले स्थानीय बासिन्दाका समस्या, अपेक्षा र सुझाव सुन्दै समाधानका लागि स्पष्ट प्रतिबद्धता जनाएका हुन् ।
घरदैलोका क्रममा मुर्ली टोलमा वर्षौंदेखि देखिँदै आएका खानेपानी अभाव, अव्यवस्थित ढल नाला, वर्षायाममा हुने डुबान, जर्जर सडक तथा सरसफाइसम्बन्धी समस्याबारे उनले विस्तृत जानकारी लिए । स्थानीयहरूले सुरक्षित पिउने पानीको कमीले दैनिकी प्रभावित भएको, वर्षातमा निकास नहुँदा बस्ती जलमग्न हुने गरेको र सडकको खराब अवस्थाले आवतजावतमा कठिनाइ भोग्नुपरेको गुनासो राखेका थिए ।
स्थानीयका धारणा सुनेपछि सरार्फले मुर्ली टोलको समग्र विकासलाई प्राथमिकतामा राख्ने आश्वासन दिए । आधारभूत पूर्वाधार सुदृढीकरण, सुरक्षित खानेपानीको व्यवस्था, व्यवस्थित ढल नाला निर्माण, सडक स्तरोन्नति तथा प्रभावकारी सरसफाइ व्यवस्थापनलाई योजनाबद्ध रूपमा अघि बढाइने उनले बताए । साथै, स्थानीय, प्रदेश र संघीय सरकारबीच समन्वय गर्दै दीर्घकालीन समाधान खोज्ने योजना रहेको पनि उल्लेख गरे ।
विकास कार्य सफल बनाउन जनप्रतिनिधि र नागरिकबीच सहकार्य अपरिहार्य रहेको बताउँदै सरार्फले जनविश्वास र सहभागितामार्फत मात्रै ठोस परिवर्तन सम्भव हुने धारणा व्यक्त गरे । उनले वीरगंजलाई स्वच्छ, सुव्यवस्थित र व्यवसायमैत्री सहरका रूपमा विकास गर्ने दीर्घकालीन लक्ष्य प्रस्तुत गर्दै मुर्ली टोलजस्ता क्षेत्रलाई प्राथमिकतामा राखिने स्पष्ट पारे ।
घरदैलो कार्यक्रममा स्थानीयहरूले उम्मेदवार स्वयं टोलमै पुगेर समस्या सुनेकोमा सकारात्मक प्रतिक्रिया दिएका थिए । विगतमा पनि विभिन्न प्रतिबद्धता गरिएपनि कार्यान्वयन पक्ष कमजोर रहेको भन्दै यसपटक व्यवहारिक पहलको अपेक्षा रहेको उनीहरूको भनाइ थियो । त्यसप्रति सरार्फले इमानदारी, पारदर्शिता र उत्तरदायित्वका साथ काम गर्ने अठोट व्यक्त गरे ।
पार्टीले क्षेत्रको समग्र विकास, रोजगारी सिर्जना, पूर्वाधार विस्तार र जीवनस्तर उकास्ने कार्यक्रमलाई मुख्य एजेन्डा बनाएको जनाएको छ । सरार्फले घरदैलो अभियानलाई जनताको समस्या बुझ्ने र साझा समाधान निर्माण गर्ने माध्यमका रूपमा अघि बढाएको उल्लेख गरे । मुर्ली टोलमा सम्पन्न भेटघाटले स्थानीयवासी र उम्मेदवारबीच प्रत्यक्ष संवादको वातावरण निर्माण गरेको छ । यसले जनताका समस्या सम्बन्धित निकायसम्म प्रभावकारी रूपमा पुग्ने विश्वास बलियो बनेको स्थानीयको धारणा छ । 
प्रतिक्रिया दिनुहोस् !