वीरगंज (पर्सा), १५ फागुन । नेकपा (एमाले) बाट पर्सा निर्वाचन क्षेत्र नम्बर १ का प्रतिनिधिसभा सदस्य उम्मेदवार प्रदीप यादवले शुक्रवार वीरगंज महानगरपालिका वडा नम्बर १५ को लक्ष्मणवा र भेडीयाही टोलमा घरदैलो तथा जनता दर्शन कार्यक्रम सम्पन्न गरेका छन् ।
कार्यक्रमका क्रममा सूर्य चुनाव चिन्हका लागि मत माग्दै यादवले आफ्ना चुनावी एजेन्डाहरू स्थानीयवासीलाई सुनाएका थिए । उनले पर्साको समग्र विकास, समृद्धि र जनताको जीवनस्तर उकास्ने स्पष्ट भिजन तथा क्षमता आफूसँग भएको बताए । ‘काम गरेर प्रमाणित भइसकेको नेतृत्वलाई मत दिनुहोस्, बहरुपियाहरूको पहिचान गर्नुहोस् र सूर्य चिन्हमा मतदान गर्नुहोस्,’ यादवले घरदैलोका क्रममा आग्रह गरे ।
पूर्व मन्त्री समेत रहेका यादवले आफ्ना प्रतिद्वन्द्वीहरूलाई अराजनीतिक व्यक्तित्व भएको बताउँदै चुनावका बेला मात्र जनताको बिचमा आएर ठूल्ठूला आश्वासन बाँड्नेहरूबाट जनतालाई सचेत रहन आग्रह गरे । यादवले पर्सा–१ लाई राम्ररी चिनेको र यहाँका हरेक समस्याबारे आफू पूर्ण जानकार रहेको उल्लेख गर्दै विगतमा दुई पटक सांसद निर्वाचित भएर अधिकांश समस्याहरू समाधान गरेको दाबी समेत गरे । ‘आगामी निर्वाचनमा जितेमा बाँकी रहेका थप समस्याहरू पनि समाधान गर्छु,’ यादवले भने ।
यादव दुई पटक सांसद निर्वाचित भइसकेका छन् । उनले जिल्लाका विभिन्न स्थानमा सडक निर्माण, स्कुल तथा अस्पताल भवन निर्माण, मन्दिर, मस्जिद र धर्मशाला निर्माण तथा अन्तिम संस्कारका लागि मसान घाट निर्माण गराएको दाबी गरे । खानेपानीको समस्या समाधानमा आफूले विशेष ध्यान दिएको उल्लेख गर्दै उनले भने, ‘आकाल पर्दा एक साताभित्र ठाउँ ठाउँमा बोरिङ जडान गरी तत्काल समस्या समाधान गरेँ । दीर्घकालीन समाधानका लागि अर्बौँ रुपैयाँका परियोजना ल्याएको छु ।’
त्यस्तै उनले संसद्मा जिल्लावासीको आवाज बन्दै पटक–पटक पर्साका समस्याहरू उठाएको पनि बताए । कार्यक्रममा स्थानीयवासीले यादवलाई फूलमाला लगाएर स्वागत गरेका थिए भने जनताले आफ्ना समस्या राखेका थिए । यादवले समस्याहरू तत्काल सम्बोधन गर्ने आश्वासन दिएका छन् ।
प्रतिक्रिया दिनुहोस् !