वीरगंज (पर्सा), १४ फागुन । पर्सा निर्वाचन क्षेत्र–१ का प्रतिनिधिसभा सदस्यका उम्मेदवार प्रदीप यादवले बिहीबार वीरगंज महानगरपालिका–३१ अन्तर्गत बेलवा टोलमा घरदैलो तथा ‘जनता दर्शन’ कार्यक्रम सम्पन्न गरेका छन् । स्थानीयसँग प्रत्यक्ष भेटघाट र संवादलाई प्राथमिकता दिँदै आयोजना गरिएको उक्त कार्यक्रममा पार्टीका नेता–कार्यकर्तासँगै सर्वसाधारणको उल्लेख्य उपस्थिति रहेको थियो । कार्यक्रमका क्रममा उम्मेदवार यादव र उनको टोलीले घरघर पुगेर स्थानीय बासिन्दासँग हातेमालो गर्दै सुझाव, गुनासा र अपेक्षा सुनेका थिए ।
नागरिकले विकासका प्राथमिकताबारे खुला छलफल गरेका थिए । शिक्षा र स्वास्थ्य सेवामा सुधार, सुरक्षित र दीर्घकालीन खानेपानी व्यवस्था, सडक स्तरोन्नति, सरसफाइ व्यवस्थापन, कृषि क्षेत्रको प्रवद्र्धन, युवाका लागि रोजगारी सिर्जना तथा महिला सशक्तीकरणलाई मुख्य एजेन्डा बनाइने प्रतिबद्धता व्यक्त गरिएको छ ।
नेतृत्व पक्षले सुशासन, पारदर्शिता र जनमुखी सेवा प्रवाहलाई केन्द्रमा राखेर योजनाबद्ध विकास अघि बढाइने स्पष्ट पारे । जनताको आवश्यकता र सुझावका आधारमै नीति तथा कार्यक्रम तय गरिने उल्लेख गर्दै स्थानीय सहभागितामै विकासको आधार निर्माण हुने उनीहरूको धारणा थियो । जनता दर्शनका क्रममा स्थानीयवासीहरूले सडक मर्मतमा ढिलाइ, ढल निकास अभाव, खानेपानीको सहज पहुँच, युवालाई रोजगारीको अवसर र सार्वजनिक सेवामा सुधारजस्ता मुद्दा प्रमुख रूपमा उठाए । उम्मेदवार यादवले यी समस्यालाई चरणबद्ध र योजनागत ढंगले समाधान गर्ने आश्वासन दिए ।
बेलवा टोलका बासिन्दाहरूले विगतमा भएका विकास प्रयासको स्मरण गर्दै आगामी दिनमा अझ परिणाममुखी कामको अपेक्षा व्यक्त गरे । निर्वाचनलाई लक्षित गर्दै नेताहरूले सूर्य चिन्हमा मतदान गरी विजयी गराइदिन अपिल गरेका छन् । ‘समृद्ध वडा, सुखी नागरिक’ को साझा लक्ष्य पूरा गर्न सबैको सहकार्य आवश्यक रहेको उनीहरूको भनाइ छ । 
प्रतिक्रिया दिनुहोस् !