वीरगंज (पर्सा), १४ फागुन । वीरगंज महानगरपालिका वडा नं. १८ (सौराहा, इनर्वा) र वडा नं. २२ (मनियारी) क्षेत्रमा आयोजित घरदैलो तथा भेटघाट कार्यक्रममा पर्सा निर्वाचन क्षेत्र नं. १ बाट प्रतिनिधिसभा सदस्यका उम्मेदवार ओमप्रकाश सरार्फले विगतका ट्रेड युनियन गतिविधिकै कारण वीरगञ्जको उद्योग–व्यवसाय धराशायी भएको आरोप लगाएका छन् ।
जनमत पार्टी का तर्फबाट उम्मेदवारी दिएका सरार्फले नेपाली कांग्रेस, नेकपा एमाले र नेकपा (माओवादी केन्द्र) निकट ट्रेड युनियनहरूको हस्तक्षेपका कारण उद्योगीहरू असुरक्षित बनेको दाबी गरे । ‘उद्योगीमैत्री वातावरण अभाव हुँदा वीरगंजको उद्योग धन्दा चौपट भएको छ,’ उनले भने, ‘अब हामी स्पष्ट नीति र स्थिर वातावरण निर्माण गरेर वीरगंजलाई पुनः अर्थपूर्ण औद्योगिक नगरीका रूपमा स्थापित गर्नेछौँ ।’
घरदैलोका क्रममा उनले मतदातासँग प्रत्यक्ष संवाद गर्दै स्थानीय अर्थतन्त्र सुदृढीकरणलाई आफ्नो मुख्य प्राथमिकता रहेको बताए । व्यापार विस्तार, रोजगारी सिर्जना, लगानीमैत्री नीति तथा उद्योग व्यवसायको संरक्षणलाई केन्द्रमा राखेर कार्यक्रम अघि बढाइने उनको प्रतिबद्धता थियो ।
स्थानीय उद्योगी तथा व्यवसायीहरूले विगतमा विभिन्न अवरोध, बन्द हडताल र अस्थिर नीतिका कारण उत्पादन र लगानी प्रभावित भएको अनुभव सुनाएका थिए । उनीहरूले स्थायित्व, सुरक्षा र प्रशासनिक सहजीकरण सुनिश्चित गर्ने नेतृत्व आवश्यक रहेको धारणा व्यक्त गरे ।
सरार्फले वीरगंजको ऐतिहासिक औद्योगिक पहिचान पुनर्जीवित गर्न स्पष्ट कार्ययोजना ल्याउने दाबी गरे । ‘वीरगंज देशकै प्रमुख औद्योगिक प्रवेशद्वार हो, तर गलत नीतिगत हस्तक्षेप र अस्थिर श्रम सम्बन्धका कारण उद्योगीहरू पलायन हुने अवस्था आयो,’ उनले भने, ‘हामी उद्योगी कामदारबीच सन्तुलित र न्यायपूर्ण सम्बन्ध कायम गर्दै उत्पादनमुखी वातावरण बनाउनेछौँ ।’
कार्यक्रममा सहभागी स्थानीयवासीहरूले पनि व्यापार, रोजगारी र पूर्वाधार विकासमा ठोस पहलको अपेक्षा व्यक्त गरे । युवाहरूले विशेषगरी रोजगारी सिर्जना र सीपमूलक तालिम कार्यक्रमको आवश्यकता औंल्याए । घरदैलो अभियानका क्रममा सरार्फले विकास र आर्थिक समृद्धिको एजेन्डालाई चुनावी केन्द्रबिन्दु बनाएका छन् । उनले वीरगंजलाई पुनः औद्योगिक उचाइमा पुर्याउने लक्ष्यसहित मतदातासँग समर्थन र आशीर्वाद मागेका छन् ।
वडा नं. १८ र २२ मा बढ्दो चुनावी सक्रियतासँगै औद्योगिक पुनरुत्थानको बहस पनि चर्किएको छ । स्थानीयहरू अब नारा भन्दा व्यवहारिक योजना र कार्यान्वयन क्षमता भएका नेतृत्वको खोजीमा रहेको देखिन्छ । 
प्रतिक्रिया दिनुहोस् !