वीरगंज (पर्सा), १४ फागुन । पर्सा निर्वाचन क्षेत्र नं. २ अन्तर्गत वीरगंज महानगरपालिका–१० मा बिहीबार नेकपा एमालेको पार्टी प्रवेश कार्यक्रम उत्साहका साथ सम्पन्न भएको छ । एमाले वडा कमिटी घडिअर्वाको आयोजनामा भएको उक्त कार्यक्रममा विभिन्न राजनीतिक दल परित्याग गर्दै एक सयभन्दा बढी व्यक्ति नेपाल कम्युनिस्ट पार्टी (एमाले) मा आबद्ध भएका हुन् ।
एमालेका पिन्टु उपाध्यायका अनुसार नवप्रवेशीहरूलाई पार्टीका केन्द्रीय सदस्य तथा पर्सा क्षेत्र नं. २ का इन्चार्ज विजय सरावगी लगायतका नेताहरूले अविरको टीका लगाई औपचारिक रूपमा स्वागत गरेका थिए ।
कार्यक्रमलाई सम्बोधन गर्दै सरावगीले युवाहरूको उल्लेखनीय सहभागिताले वीरगंज–१० मा एमालेको संगठन थप सुदृढ भएको बताए । उनले आगामी प्रतिनिधिसभा निर्वाचनमा पर्सा क्षेत्र नं. २ की उम्मेदवार रिमा कुमारी यादव लाई विजयी बनाउन सबै नेता कार्यकर्तालाई सक्रिय भूमिका निर्वाह गर्न आग्रह गरे । साथै, उनले एमालेको चुनाव चिन्ह ‘सूर्य’मा मतदान गरी पार्टीलाई सशक्त जनमत दिन अपिल समेत गरे ।
एमाले वडा नं. १० का अध्यक्ष मुकेश पटेलको अध्यक्षता र सरावगीको प्रमुख आतिथ्यमा सम्पन्न कार्यक्रममा एमाले वीरगंज महानगर कमिटीका पूर्व अध्यक्ष नवराज शर्मा, नेता अजय गुप्ता लगायतले मन्तव्य राख्दै यसपटकको निर्वाचनमा एमालेको जित अपरिहार्य रहेकोमा जोड दिएका थिए । कार्यक्रममा पार्टीमा प्रवेश गरेका युवाहरूले पर्सा क्षेत्र नं. २ मा एमाले उम्मेदवार यादवलाई विजयी गराउन पूर्ण सक्रियताका साथ लाग्ने प्रतिबद्धता व्यक्त गरेका छन् । 
प्रतिक्रिया दिनुहोस् !