वीरगंज (पर्सा), १४ फागुन । रामकिशोर सिंह (पराग) ले प्रतिनिधिसभा सदस्यका लागि आफ्नो चुनावी अभियानलाई तीव्र बनाउँदै मंगलबार राति वीरगंज महानगरपालिका–२३ अन्तर्गत प्रसौनी र सबैठवा गाउँमा रात्रिकालीन घरदैलो कार्यक्रम सम्पन्न गरेका छन् । उज्यालो नेपाल पार्टीका तर्फबाट उम्मेदवार बनेका सिंहलाई स्थानीयवासीहरूले फूलमाला र खादा ओढाएर आत्मीय स्वागत तथा सम्मान प्रकट गरेका थिए । कार्यक्रममा युवादेखि ज्येष्ठ नागरिकसम्मको उत्साहपूर्ण उपस्थिति देखिएको थियो ।
घरदैलो भेटघाटका क्रममा स्थानीयहरूले विगतका राजनीतिक दल र उम्मेदवारप्रति असन्तुष्टि व्यक्त गर्दै चुनावी समयमा मात्र आश्वासन बाँड्ने तर विकास, रोजगारी र आधारभूत सेवामा ठोस उपलब्धि नदेखिएको गुनासो राखे । युवाहरूलाई चुनाव नजिकिँदा मात्र प्रयोग गर्ने र विजयी भएपछि जनताबाट टाढा हुने प्रवृत्तिको अन्त्य हुनुपर्ने उनीहरूको भनाइ थियो । यसपटक सक्षम, जवाफदेही र नयाँ सोच भएका उम्मेदवारलाई साथ दिने दृढता समेत स्थानीयहरूले व्यक्त गरे ।
स्थानीय बासिन्दाले कुलमान घिसिङ लाई परिणाममुखी नेतृत्वको उदाहरणका रूपमा उल्लेख गर्दै सिंहप्रति समर्थन जनाएका थिए । उम्मेदवार सिंहले आफू निर्वाचित भएलगत्तै शिक्षा, स्वास्थ्य र रोजगारीलाई उच्च प्राथमिकतामा राखेर काम अघि बढाउने प्रतिबद्धता जनाए । गाउँमै उद्योग कलकारखाना स्थापना गरी योग्य युवालाई रोजगारी उपलब्ध गराउने आफ्नो योजना रहेको उनले जानकारी दिए । साथै, वीरगंज महानगरपालिका–२० का निर्वाचित प्रतिनिधिका रूपमा हासिल अनुभवलाई संघीय संसदमा उपयोग गर्दै क्षेत्रीय विकासका मुद्दा सशक्त रूपमा उठाउने अठोट पनि व्यक्त गरे ।
कार्यक्रमको समापनमा स्थानीयहरूले सिंहलाई अग्रिम विजयको शुभकामना दिँदै आगामी निर्वाचनमा पूर्ण साथ र समर्थन रहने विश्वास व्यक्त गरेका थिए । 
प्रतिक्रिया दिनुहोस् !