वीरगंज (पर्सा), १२ फागुन । नेपाल कम्युनिस्ट पार्टी (एमाले)की पर्सा निर्वाचन क्षेत्र नम्बर–२ अन्तर्गत प्रतिनिधिसभा सदस्य उम्मेदवार रिमा कुमारी यादवले मंगलबार वीरगंज महानगरपालिका वडा नं. ९ र १० मा सघन घरदैलो अभियान सञ्चालन गरेकी छन् । घरदैलोका क्रममा उनले स्थानीय मतदातासँग प्रत्यक्ष संवाद गर्दै उनीहरूको समस्या, सुझाव र अपेक्षा सुनेकी थिइन् ।
भेटघाटका क्रममा स्थानीयले सडक स्तरोन्नति, ढल निकास व्यवस्थापन, स्वच्छ खानेपानी, सुलभ स्वास्थ्य सेवा, विद्यालयको गुणस्तर अभिवृद्धि, रोजगारी सिर्जना तथा युवाका लागि खेलकुद पूर्वाधार निर्माण जस्ता विषयमा ध्यानाकर्षण गराएका थिए । जवाफमा उम्मेदवार यादवले ती सबै मागलाई प्राथमिकतामा राखेर काम गर्ने प्रतिबद्धता व्यक्त गरिन् । ‘जनताको घरदैलोमै पुगेर समस्या बुझ्नु हाम्रो दायित्व हो । तपाईंहरूको विश्वासले जितेपछि विकासलाई व्यवहारमा उतार्नेछौं,’ उनले भनिन् । आगामी फागुन २१ गते हुने निर्वाचनमा सूर्य चुनाव चिन्हमा मतदान गरी आफूलाई विजयी गराउन उनले आग्रह पनि गरिन् ।
कार्यक्रमका क्रममा स्थानीय बासिन्दाले फूलमाला र खादा ओढाएर यादव र उनको टोलीलाई स्वागत गरेका थिए । विशेषगरी महिला र युवाहरूको उल्लेखनीय सहभागिता देखिएको थियो । घरदैलो अभियानमा एमालेका केन्द्रीय सदस्य प्रभु हजरा, विजय सरावगी, मधेश प्रदेश उपाध्यक्ष बिचारी यादव, नेता मनोज कुशवाहा, अजय गुप्ता, अंगद गुप्ता लगायत स्थानीय नेताकार्यकर्ताको सक्रिय उपस्थिति रहेको थियो । 
प्रतिक्रिया दिनुहोस् !