वीरगंज (पर्सा), १२ फागुन । नेपाल कम्युनिस्ट पार्टी (एमाले)का तर्फबाट पर्सा निर्वाचन क्षेत्र नम्बर–१ का प्रतिनिधिसभा सदस्य उम्मेदवार प्रदीप यादवले मंगलबार वीरगंज महानगरपालिका–३२ टेढा गाउँका विभिन्न टोलमा घरदैलो तथा ‘जनता दर्शन’ कार्यक्रम सञ्चालन गरेका छन् ।
घर घर पुगेर मतदातासँग प्रत्यक्ष संवाद गर्दै उनले सूर्य चुनाव चिन्हमा मतदान गरी एमालेका सम्पूर्ण उम्मेदवारलाई विजयी बनाउन आग्रह गरे । स्थानीय बासिन्दासँगको भेटघाटमा उनले वर्तमान राजनीतिक अवस्थाबारे चिन्ता व्यक्त गर्दै संविधान, सङ्घीय व्यवस्था र राष्ट्रिय अखण्डताको संरक्षणका लागि एमाले नेतृत्वको सरकार आवश्यक रहेको बताए ।
यादवले जेन–जी आन्दोलनपछि मुलुकमा राजनीतिक अन्योल सिर्जना भएको उल्लेख गर्दै त्यसबेला एमाले अध्यक्ष केपी शर्मा ओलीलगायत नेताहरूले दृढ अडानका साथ विदेशी हस्तक्षेपविरुद्ध आवाज उठाएको स्मरण गरे । देशलाई सही दिशामा अघि बढाउन र राष्ट्रिय स्वाधीनता सुदृढ गर्न एमाले नेतृत्व अपरिहार्य रहेको उनको भनाइ थियो ।
आफ्ना दुई कार्यकालको अनुभव प्रस्तुत गर्दै उनले पर्सा जिल्ला र आफ्नो निर्वाचन क्षेत्रमा उल्लेखनीय विकास भएको दाबी गरे । आफू निर्वाचित हुनुअघि र हालको अवस्थाबीच ठूलो अन्तर आएको जिकिर गर्दै सडक, पुल, विद्यालय, स्वास्थ्य संस्था, सिँचाइ तथा विद्युत् विस्तारमा व्यापक प्रगति भएको बताए । पुनः जनताबाट अवसर पाए अधुरा योजना तीव्र गतिमा सम्पन्न गर्ने प्रतिबद्धता पनि उनले व्यक्त गरे ।
आगामी योजनाबारे जानकारी दिँदै उनले युवा बेरोजगारी न्यूनीकरण, स्वदेशमै रोजगारी सिर्जना, महिला सशक्तीकरण कार्यक्रम, कृषि र पर्यटन प्रवद्र्धन तथा स्थानीय उद्योग स्थापना मार्फत आर्थिक समृद्धि हासिल गर्ने लक्ष्य सुनाए ।
प्रतिस्पर्धी उम्मेदवारप्रति टिप्पणी गर्दै यादवले केही व्यक्ति चुनावी समयमा मात्र सक्रिय हुने प्रवृत्ति रहेको आरोप लगाए । आफू भने निरन्तर जनतासँग सम्पर्कमा रही काम गर्दै आएको र भविष्यमा पनि जनताकै साथमा रहेर सेवा गर्ने प्रतिबद्धता जनाए । घरदैलो तथा जनता दर्शन कार्यक्रममा एमालेका केन्द्रीय र स्थानीय नेताकार्यकर्ता, विभिन्न टोलका बासिन्दा, युवा, महिला तथा ज्येष्ठ नागरिकहरूको उल्लेख्य उपस्थिति रहेको थियो ।
प्रतिक्रिया दिनुहोस् !