वीरगंज (पर्सा), ११ फागुन । उज्यालो नेपाल पार्टी का तर्फबाट पर्सा निर्वाचन क्षेत्र नम्बर १ का प्रतिनिधिसभा सदस्य उम्मेदवार रामकिशोर सिंह (पराग)ले शुक्रबार वीरगंज महानगरपालिका–८ अन्तर्गत गहवा टोलमा सघन घरदैलो कार्यक्रम सञ्चालन गरेका छन् । कार्यक्रममा स्थानीय बासिन्दा तथा युवाहरूले फूलमाला लगाएर उम्मेदवार सिंहको आत्मीय स्वागत गरेका थिए ।
घरदैलोका क्रममा स्थानीयहरूले विगतमा विभिन्न दल र उम्मेदवारबाट विकास तथा रोजगारीका नाममा आश्वासन मात्रै पाएको तर व्यवहारमा उल्लेखनीय उपलब्धि नदेखिएको भन्दै असन्तुष्टि व्यक्त गरे । चुनावको बेला युवालाई प्रयोग गर्ने, रोजगारीको वाचा गर्ने र जितिसकेपछि जनतासँग सम्पर्कविहीन हुने प्रवृत्तिबाट दिक्क भएको उनीहरूको भनाइ थियो ।
यसपटक भने परिणाम दिन सक्ने नयाँ र सक्षम उम्मेदवारलाई साथ दिने प्रतिबद्धता स्थानीयहरूले जनाएका छन् । सहभागीहरूले कुलमान घिसिङको कार्यशैलीलाई उदाहरणका रूपमा उल्लेख गर्दै ‘काम गर्ने नेतृत्व’को आवश्यकता औंल्याए । उज्यालो नेपाल पार्टीले त्यही सोच बोकेको दाबी गर्दै उम्मेदवार सिंहप्रति समर्थन व्यक्त गरिएको थियो ।
कार्यक्रममा बोल्दै सिंहले आफू निर्वाचित भएलगत्तै स्थानीय समस्यालाई प्राथमिकताका साथ सम्बोधन गर्ने प्रतिबद्धता व्यक्त गरे । शिक्षा, स्वास्थ्य र रोजगारीलाई पहिलो प्राथमिकतामा राख्दै योजनाबद्ध ढंगले काम अघि बढाइने उनले बताए । ‘युवालाई अवसर दिनु नै समृद्ध समाजको आधार हो,’ उनले भने, ‘स्थानीय उद्योग तथा कलकारखानामा सक्षम र योग्य स्थानीयलाई रोजगारीमा प्राथमिकता दिलाउन पहल गर्नेछु ।’
सिंहले वीरगंज महानगरपालिका–२० मा निर्वाचित भएर काम गर्दा हासिल गरेको अनुभवलाई संघीय संसदसम्म पुर्याई क्षेत्रीय विकासका मुद्दा सशक्त रूपमा उठाउने धारणा राखे । स्थानीय तहमा काम गर्दा सिकेको अनुभव र जनताको अपेक्षालाई केन्द्रमा राखेर संसदमा आवाज बुलन्द गर्ने उनको भनाइ थियो । कार्यक्रममा सहभागी स्थानीयहरूले उम्मेदवार सिंहलाई आगामी निर्वाचनमा सफलता मिलोस् भन्ने शुभकामना व्यक्त गरेका थिए ।
गहवा टोलमा सम्पन्न घरदैलो कार्यक्रममा उल्लेखनीय जनसहभागिता देखिएको आयोजकले जनाएको छ । चुनाव नजिकिँदै जाँदा गहवा क्षेत्रमा राजनीतिक गतिविधि थप सक्रिय बन्दै गएको छ । 
प्रतिक्रिया दिनुहोस् !