वीरगंज (पर्सा), ११ फागुन । पर्सा क्षेत्र नं. ४ अन्तर्गत जनता समाजवादी पार्टी, नेपाल (जसपा) का उम्मेदवार डा. कृपासिन्धु चौधरी ले कालिकामाई गाउँपालिका का हरिहरपुर, बिरञ्चीबर्वा र कट्टीबलुवा क्षेत्रमा घरदैलो कार्यक्रम सम्पन्न गरेका छन् ।
अभियानका क्रममा उम्मेदवार चौधरीले टोल–टोल पुगेर स्थानीय मतदातासँग प्रत्यक्ष भेटघाट गर्दै उनीहरूका समस्या र सरोकार सुनेका थिए । उनले आफ्नो चुनाव चिन्ह छातामा मतदान गर्न आग्रह गर्दै निर्वाचित भएपछि जनताका आवाजलाई संसद्सम्म प्रभावकारी रूपमा पुर्याउने प्रतिबद्धता व्यक्त गरे ।
डा. चौधरीले आफू शिक्षित तथा अनुभवी नेतृत्व भएको दाबी गर्दै विगतमा ठाकुर राम बहुमुखी क्याम्पस को प्रमुख र राष्ट्रिय आयोजना आयोग सदस्यका रूपमा काम गर्दाका अनुभवहरू प्रस्तुत गरे । उनले विजयी भए सधैं जनताको साथमा रहेर विकासका काम अघि बढाउने विश्वास पनि व्यक्त गरे । घरदैलोका क्रममा स्थानीय बासिन्दाले उम्मेदवारलाई फूलमाला लगाएर स्वागत गरेका थिए ।
जसपा नेताहरूले जनमत आफ्नो पक्षमा बलियो रहेको भन्दै आगामी निर्वाचनमा आफ्नो जित सुनिश्चित हुने दाबी गरेका छन् । कार्यक्रममा सिंगासन सा. कलवार, दिनेश कलवार, जयनारायण कुर्मी लगायत स्थानीय नेता तथा कार्यकर्ताको उल्लेखनीय उपस्थिति रहेको थियो । 
प्रतिक्रिया दिनुहोस् !