वीरगंज (पर्सा), ११ फागुन । पर्सा निर्वाचन क्षेत्र नं. १ अन्तर्गत राष्ट्रिय स्वतन्त्र पार्टी (रास्वपा) का उम्मेदवार हरि पन्त ले वीरगंज महानगरपालिका वडा नं. १८ भवानीपुरमा आयोजना गरेको घरदैलो तथा मतदाता भेटघाट कार्यक्रम उत्साहपूर्ण रूपमा सम्पन्न भएको छ । कार्यक्रममा जेनेरेशन–जेड (जेन्जी) का युवा, प्रौढ तथा ज्येष्ठ नागरिकलगायत विभिन्न वर्गका स्थानीय बासिन्दाको उल्लेखनीय उपस्थिति देखिएको थियो ।
घरदैलो अभियानका क्रममा पन्तले घर घरमा पुगेर मतदातासँग प्रत्यक्ष संवाद गर्दै विकास, सुशासन र पारदर्शिताप्रति आफ्नो दृष्टिकोण स्पष्ट पारेका थिए । विविध पेशा, व्यवसाय तथा सामाजिक क्षेत्रमा आबद्ध व्यक्तिहरूको सहभागिताले कार्यक्रमलाई थप ऊर्जा प्रदान गरेको आयोजकले जनाएको छ । स्थानीय तहमा प्रभाव राख्ने व्यक्तित्वहरूको उपस्थितिले चुनावी वातावरण थप सक्रिय र प्रतिस्पर्धी बनेको संकेत दिएको छ ।
कार्यक्रममा सहभागी स्थानीयले परम्परागत दलहरूप्रति बढ्दो असन्तुष्टि र वैकल्पिक राजनीतिक शक्तिको खोजी नै आफ्नो समर्थनको मुख्य कारण रहेको बताएका छन् । उनीहरूले पारदर्शी शासन प्रणाली, जवाफदेही नेतृत्व र युवामैत्री सोचप्रतिको प्रतिबद्धताका कारण रास्वपाप्रति आकर्षण बढेको उल्लेख गरे । उम्मेदवार पन्तले जनतासँगको संवादमा विश्वासलाई आधार बनाएर जिम्मेवार र परिणाममुखी राजनीति गर्ने अठोट व्यक्त गरे । स्थानीय आवश्यकताअनुसार नीति तथा कार्यक्रम तय गरी व्यवहारमा देखिने विकासका काम अघि बढाउने उनले प्रतिबद्धता जनाएका छन् । 
प्रतिक्रिया दिनुहोस् !