वीरगंज (पर्सा), ११ फागुन । वीरगंज महानगरपालिका–२६ मा नेपाल कम्युनिष्ट पार्टी (एमाले) पर्सा क्षेत्र नं. २ की प्रतिनिधिसभा सदस्य उम्मेदवार रिमा कुमारी यादव को घरदैलो अभियान उत्साहपूर्ण वातावरणमा सम्पन्न भएको छ । निर्वाचन नजिकिँदै जाँदा उनले टोल–टोलमा पुगेर मतदातासँग प्रत्यक्ष भेटघाट र संवादलाई तीव्रता दिएकी हुन् ।
घरदैलो कार्यक्रमका क्रममा यादवले पर्सा–२ लाई आर्थिक, सामाजिक तथा पूर्वाधार विकासका दृष्टिले नमुना क्षेत्रका रूपमा अघि बढाउने प्रतिबद्धता दोहोर्याइन् । युवाका लागि रोजगारी सिर्जना, कृषकलाई आधुनिक प्रविधिसँग जोड्ने योजना, महिलाको सशक्तीकरण तथा सडक, ढल र सरसफाइजस्ता आधारभूत सेवाको सुधारलाई प्राथमिकतामा राख्ने उनले स्पष्ट पारिन् ।
कार्यक्रममा समानुपातिक उम्मेदवार बिचारी यादव, प्रदेश कमिटी सदस्य रमिला खातुन तथा क्षेत्र नं. २ का अध्यक्ष मनोज कुशवाहा लगायत नेता–कार्यकर्ताको उल्लेखनीय उपस्थिति रहेको थियो । टोलीले स्थानीय बासिन्दासँग प्रत्यक्ष भेटघाट गर्दै विकास, शिक्षा, स्वास्थ्य, कृषि, रोजगारी र पूर्वाधार विस्तारसम्बन्धी आफ्ना योजनाबारे जानकारी गराएको जनाएको छ ।
नेताहरूले आगामी निर्वाचनमा सूर्य चिन्हमा मतदान गरी एमाले उम्मेदवारलाई विजयी बनाउन मतदातासँग अपिल गरेका थिए । कार्यक्रममा सहभागी स्थानीयले विकास र सुशासनप्रति आशा व्यक्त गर्दै सकारात्मक प्रतिक्रिया दिएको बताइएको छ । वडा नं. २६ मा सम्पन्न यस कार्यक्रमसँगै एमालेको चुनावी अभियान थप सक्रिय र सशक्त बनेको छ । नेता तथा कार्यकर्ताले आगामी दिनहरूमा पनि घरदैलो र जनभेटघाटलाई अझ व्यापक बनाउने जनाएका छन् । 
प्रतिक्रिया दिनुहोस् !