वीरगंज (पर्सा), ११ फागुन । पर्सा निर्वाचन क्षेत्र नम्बर–३ अन्तर्गत सखुवा प्रसौनी गाउँपालिका वडा नं. २ जमुनियामा नेपाल कम्युनिष्ट पार्टी (एमाले) ले चुनावी गतिविधि तीव्र पारेको छ । पार्टीले अगुवा नेता तथा सक्रिय कार्यकर्तासँग भेटघाट तथा रणनीतिक छलफल कार्यक्रम आयोजना गरेको हो । कार्यक्रम सम्पन्न गर्न एमालेका नेता तथा सखुवा प्रसौनी गाउँपालिकाका पूर्व अध्यक्ष प्रदीप जयसवाल ले सक्रिय भूमिका निर्वाह गरेका थिए ।
उक्त भेलामा स्थानीय तहका अगुवा नेता, युवा कार्यकर्ता र समर्थकहरूको उल्लेखनीय उपस्थिति रहेको थियो । छलफलका क्रममा संगठनलाई थप मजबुत बनाउने, घरदैलो अभियानलाई प्रभावकारी बनाउने, मतदाता सम्पर्क विस्तार गर्ने तथा विकासका एजेण्डालाई जनस्तरसम्म पुर्याउने विषयमा विस्तृत रणनीति तय गरिएको सहभागीहरूले जानकारी दिएका छन् ।
वक्ताहरूले पर्सा–३ को दीर्घकालीन विकासका लागि कृषि क्षेत्रमा आधुनिकीकरण, सडक तथा अन्य पूर्वाधार विस्तार, शिक्षा र स्वास्थ्य सेवाको गुणस्तर सुधार तथा युवालाई रोजगारीसँग जोड्ने कार्यक्रमलाई प्राथमिकता दिनुपर्ने धारणा व्यक्त गरे । उनीहरूले स्थायित्व, सुशासन र समृद्धिका लागि एमाले नै सक्षम र विश्वसनीय शक्ति भएको दाबीसमेत गरे ।
छलफलका क्रममा पर्सा–३ का युवा उम्मेदवार रूपेश पाण्डेको सक्रियताबारे सकारात्मक चर्चा भएको बताइएको छ । विगत केही वर्षदेखि गाउँ–टोलमा पुगेर जनताका समस्या बुझ्दै आएका पाण्डेप्रति स्थानीय तहमा विश्वास र अपेक्षा बढ्दै गएको नेताहरूले उल्लेख गरे । फागुन २१ गते हुने निर्वाचनमा उनलाई विजयी बनाउन सबै तहबाट सक्रिय भूमिका निर्वाह गर्ने निर्णय गरिएको जनाइएको छ ।
कार्यक्रममा नेता जयसवालले संगठनलाई एकताबद्ध, अनुशासित र परिणाममुखी ढंगले अघि बढाउन आग्रह गरे। उनले प्रत्येक टोल र बस्तीमा पुगेर पार्टीका नीति, कार्यक्रम र विकास दृष्टिकोण स्पष्ट रूपमा जनतामाझ पुर्याउन कार्यकर्तालाई निर्देशन दिएका थिए । पर्सा–३ मा राजनीतिक प्रतिस्पर्धा चर्किंदै गइरहेको अवस्थामा जमुनियामा सम्पन्न यो कार्यक्रमलाई एमालेको पक्षमा वातावरण निर्माण गर्ने महत्वपूर्ण प्रयासका रूपमा हेरिएको छ । पार्टीका नेताहरूका अनुसार अब घरदैलो, टोलसभा, युवासँग अन्तरक्रिया तथा जनसम्पर्क कार्यक्रमलाई थप तीव्रता दिइनेछ । 
प्रतिक्रिया दिनुहोस् !