वीरगंज (पर्सा), १० फागुन । राष्ट्रिय स्वतन्त्र पार्टी (रास्वपा) का तर्फबाट पर्सा निर्वाचन क्षेत्र नम्बर २ का प्रतिनिधिसभा सदस्य उम्मेदवार सुशील कुमार कानुले आइतबार पर्सागढी नगरपालिका–९ का बडेर्वा र तेलिया तथा वडा नम्बर ७ को फुलवारीयामा घरदैलो तथा जनसम्पर्क कार्यक्रम सम्पन्न गरेका छन् । टोल टोलमा पुगेर स्थानीय बासिन्दासँग प्रत्यक्ष संवाद गरेका कानुले आफ्नो चुनावी प्राथमिकता र योजनाबारे जानकारी गराउँदै घण्टी चुनाव चिन्हमा मतदान गर्न आग्रह गरे ।
उनले मुलुकमा लामो समयदेखि देखिँदै आएको भ्रष्टाचार र बेथितिले अर्थतन्त्र तथा सुशासनमा गम्भीर असर पारेको उल्लेख गर्दै अब परिवर्तन अपरिहार्य भएको बताए । ‘देशलाई सही दिशामा अघि बढाउन घण्टी छापमा मतदान आवश्यक छ,’ उनले मतदातासँग भने । संवादका क्रममा कानुले प्रजातन्त्र स्थापना भएदेखि विभिन्न राजनीतिक शक्तिहरू सत्तामा पुगे पनि सुशासन र पारदर्शितामा अपेक्षित सुधार हुन नसकेको आरोप लगाए । उनले प्रणालीमा देखिएको कमजोरीका कारण विकासको गति अवरुद्ध भएको दाबी गर्दै नयाँ राजनीतिक संस्कार आवश्यक रहेको बताए ।
स्थानीयसँग खुला छलफल गर्दै उनले क्षेत्रका दीर्घकालीन समस्या, त्यसका जरा र सम्भावित समाधानबारे धारणा राखे । निर्वाचित भएपछि महिलाहरूलाई लक्षित गरी घरमै बसेर सिक्न सकिने प्राविधिक तथा सीपमूलक तालिम सञ्चालन गर्ने योजना उनले सुनाए । कृषि, पशुपालन, सिलाइ कटाइ लगायतका सीपमूलक कार्यक्रममार्फत महिलालाई आत्मनिर्भर बनाउने आफ्नो प्राथमिकता रहेको उनले स्पष्ट पारे । ‘सीप र प्रविधिमा पहुँच विस्तार भएमा पारिवारिक आम्दानी वृद्धि हुनेछ र आर्थिक सशक्तीकरणमा ठूलो टेवा पुग्नेछ,’ कानुको भनाइ थियो ।
घरदैलोका क्रममा किसानहरूले जङ्गली जनावरबाट हुने बाली क्षतिको समस्या उठाएका थिए । यस विषयमा कानुले प्रभावकारी नीति निर्माण, उचित क्षतिपूर्ति व्यवस्था र दीर्घकालीन समाधानका कार्यक्रम अघि बढाउने प्रतिबद्धता जनाए । ‘किसानको मेहनतको मूल्य सुरक्षित गर्ने र उनीहरूको पसिनाको सम्मान हुने व्यवस्था गर्न सदनमा सशक्त आवाज उठाउनेछु,’ उनले बताए । कार्यक्रममा सहभागी स्थानीय बासिन्दाले कानुलाई नयाँ सोच, स्पष्ट दृष्टिकोण र जनताको कुरा प्रत्यक्ष सुन्ने उम्मेदवारका रूपमा चित्रण गरेका थिए ।
उनीहरूले परम्परागत राजनीतिक अभ्यासभन्दा फरक शैलीको नेतृत्व आवश्यक रहेको धारणा व्यक्त गर्दै यसपटक परिवर्तनका लागि रास्वपालाई अवसर दिनुपर्ने बताए । घरदैलो कार्यक्रम उत्साहपूर्ण र शान्त वातावरणमा सम्पन्न भएको आयोजकले जनाएको छ । उम्मेदवार कानुले आगामी दिनमा पनि निर्वाचन क्षेत्रका अन्य बस्तीमा जनसम्पर्क अभियानलाई निरन्तरता दिँदै मतदातासँग प्रत्यक्ष भेटघाट जारी राख्ने जानकारी दिएका छन् ।
प्रतिक्रिया दिनुहोस् !