वीरगंज (पर्सा), १० फागुन । नेपाल कम्युनिष्ट पार्टी (एमाले) का तर्फबाट पर्सा निर्वाचन क्षेत्र नम्बर १ का प्रतिनिधिसभा सदस्य उम्मेदवार प्रदीप यादवले वीरगंज महानगरपालिका–२१ मा व्यापक घरदैलो कार्यक्रम सञ्चालन गर्दै मतदातासँग प्रत्यक्ष संवाद गरेका छन् । आइतबार बिहानैदेखि सुरु भएको अभियानअन्तर्गत उनले वडाका विभिन्न टोलमा पुगेर स्थानीय बासिन्दासँग भेटघाट गर्दै आफ्ना चुनावी एजेन्डा प्रस्तुत गरेका थिए ।
घरदैलोका क्रममा उम्मेदवार यादवले मतदातालाई सूर्य चुनाव चिन्हमा मतदान गर्न आग्रह गरे । उनले पर्साको समग्र विकास, आर्थिक समृद्धि र राजनीतिक स्थायित्व सुनिश्चित गर्न एमालेको विजय आवश्यक रहेको धारणा व्यक्त गरे । ‘पर्सालाई विकासको नयाँ चरणमा पुर्याउन र स्थिर सरकार निर्माण गर्न सूर्य चिन्हमा मतदान अनिवार्य छ,’ उनले भने ।
पूर्व मन्त्रीसमेत रहेका यादवले आफूले विगतमा सांसद र खानेपानी मन्त्रीका रूपमा निर्वाह गरेको भूमिकाबारे स्मरण गराउँदै त्यस अवधिमा क्षेत्रका लागि सम्पन्न गरिएका योजनाहरू उल्लेख गरे । उनले खानेपानी विस्तार, पूर्वाधार सुधार र आधारभूत सेवाको पहुँच विस्तारमा आफूले खेलेको भूमिकाबारे जानकारी दिँदै अधुरा योजना पूरा गर्न पुनः जनताको साथ आवश्यक रहेको बताए । ‘मैले जिम्मेवारी सम्हालेको समयमा सुरु गरेका कामहरूलाई पूर्णता दिन र नयाँ योजनाहरू अघि बढाउन एमालेको जित जरुरी छ,’ उनले जोड दिए ।
स्थानीय मतदाताले घरदैलोका क्रममा सडक स्तरोन्नति, ढल निकास व्यवस्थापन, सुरक्षित खानेपानी, नियमित विद्युत आपूर्ति, रोजगारीको अवसर, गुणस्तरीय शिक्षा र सुलभ स्वास्थ्य सेवाजस्ता समस्याहरू उठाएका थिए । उम्मेदवार यादवले ती सबै माग ध्यानपूर्वक सुनेर प्राथमिकताका आधारमा समाधानतर्फ अघि बढ्ने प्रतिबद्धता जनाए । उनले स्थानीय आवश्यकताअनुसार ठोस योजना बनाएर चरणबद्ध रूपमा कार्यान्वयन गरिने बताए ।
यादवले विगतका चुनावमा आफूले गरेका कार्यहरूको समीक्षा गर्दै जनताले प्रत्यक्ष अनुभव गरेका विकास योजनालाई निरन्तरता दिने प्रतिवद्धता व्यक्त गरे । उनले जनप्रतिनिधि जनताको सेवक भएकाले निर्वाचनपछि पनि निरन्तर सम्पर्कमा रहने र समस्याको समाधानका लागि सक्रिय रहने विश्वास दिलाए ।
घरदैलो कार्यक्रममा एमालेका स्थानीय नेता कार्यकर्ता, वडाका जनप्रतिनिधि तथा सर्वसाधारणको उल्लेखनीय सहभागिता रहेको थियो। अभियान उत्साहपूर्ण वातावरणमा सम्पन्न भएको र मतदाताबाट सकारात्मक प्रतिक्रिया प्राप्त भएको आयोजकहरूले जनाएका छन् । उम्मेदवार यादवले आगामी दिनमा पनि निर्वाचन क्षेत्रका अन्य वडामा घरदैलो तथा जनसम्पर्क अभियानलाई तीव्रता दिँदै मतदाताको घरदैलोमा पुग्ने कार्यक्रम जारी रहने जानकारी दिएका छन् । 
प्रतिक्रिया दिनुहोस् !