वीरगंज (पर्सा), ९ फागुन । वीरगंज महानगरपालिका–२४ अन्तर्गत रामगाढवा टोलका दीर्घकालीन शहरी समस्यालाई चुनावी बहसको केन्द्रमा ल्याउँदै पर्सा क्षेत्र नं. २ का प्रतिनिधिसभा सदस्य उम्मेदवार अशोक टेमानीले समाधान उन्मुख योजना अघि सारेका छन् । जनता समाजवादी पार्टी (जसपा) नेपालका तर्फबाट उम्मेदवारी दिएका टेमानीले घरदैलो अभियानमार्फत स्थानीय बासिन्दासँग प्रत्यक्ष संवाद गर्दै समस्या पहिचान र समाधानका उपायबारे धारणा राखेका हुन् ।
घरदैलोका क्रममा टेमानीले ज्येष्ठ नागरिक, महिला, युवा र किसानसँग छलफल गर्दै उनीहरूको दैनन्दिन जीवनसँग जोडिएका कठिनाइबारे जानकारी संकलन गरे । स्थानीयले खानेपानी अभाव, गुणस्तरीय शिक्षा र सहज स्वास्थ्य सेवाको कमी, कृषि क्षेत्रका अवरोध, वर्षेनी दोहोरिने डुबान–बाढी तथा कमजोर भौतिक पूर्वाधारलाई मुख्य समस्या रूपमा औंल्याए ।
रामगाढवा टोलमा खानेपानी संकट वर्षौंदेखि जटिल बन्दै गएको स्थानीयको गुनासो छ । चापाकल सुक्ने, नियमित धारा नआउने र ट्यांकरमा निर्भर रहनुपर्ने अवस्थाले सर्वसाधारण प्रभावित भएको उनीहरूले बताए। टेमानीले दीर्घकालीन समाधानका लागि आधुनिक पानी आपूर्ति प्रणाली, भूमिगत जल संरक्षण तथा व्यवस्थित वितरण संयन्त्र आवश्यक रहेको उल्लेख गरे ।
शिक्षा क्षेत्रमा विद्यालयको पूर्वाधार कमजोर, शिक्षक दरबन्दी अपुग र शैक्षिक सामग्रीको अभावले विद्यार्थी प्रभावित भएको अभिभावकहरूको भनाइ छ । यस सन्दर्भमा टेमानीले विद्यालय सुधार कार्यक्रम, प्राविधिक शिक्षाको विस्तार र युवा लक्षित सीप विकास तालिम सञ्चालन गर्ने प्रतिबद्धता व्यक्त गरे ।
स्वास्थ्य सेवाको पहुँच पनि सन्तोषजनक नरहेको भन्दै स्थानीयले सामान्य उपचारका लागि समेत टाढा धाउनुपर्ने अवस्था रहेको बताएका छन् । स्वास्थ्य चौकीको स्तरोन्नति, औषधि आपूर्ति र दक्ष जनशक्ति व्यवस्थापनका लागि पहल गर्ने टेमानीले आश्वासन दिए ।
कृषि क्षेत्रमा मल, बीउ, सिँचाइ र बजारको अभावले किसान मारमा परेको गुनासो सुनियो । वर्षायाममा डुबान र बाढीका कारण खेतबारीमा क्षति पुग्ने समस्या पनि दोहोरिने गरेको बताइएको छ । यसबारे टेमानीले ढल निकास सुधार, तटबन्ध निर्माण, सिँचाइ विस्तार तथा कृषकलाई अनुदान र सहुलियत ऋण उपलब्ध गराउने विषयमा पहल गर्ने बताए ।
भौतिक पूर्वाधारतर्फ पनि टोलमा कच्ची तथा जीर्ण सडक, अव्यवस्थित ढल निकास र वर्षायाममा पानी जम्ने समस्या गम्भीर रहेको स्थानीयले औंल्याए । टेमानीले दीर्घकालीन पूर्वाधार विकास योजना बनाएर पारदर्शी बजेट विनियोजन सुनिश्चित गर्ने प्रतिबद्धता जनाए ।
प्रत्यक्ष संवादका क्रममा उनले राजनीति जनजीवन रूपान्तरणका लागि हुनुपर्ने धारणा राख्दै निर्वाचित भएमा योजनाबद्ध ढंगले काम गर्ने बताए । स्थानीय सुझावलाई घोषणापत्रमा समेट्ने प्रतिबद्धता पनि उनले दोहोर्याए ।
घरदैलो कार्यक्रममा युवाहरूको उल्लेखनीय उपस्थिति देखिएको थियो। उनीहरूले रोजगारी, सीपमूलक तालिम र स्वरोजगार कार्यक्रमको माग गरेका थिए। टेमानीले युवालाई उत्पादनशील क्षेत्रमा जोड्ने विशेष कार्यक्रम ल्याउने आश्वासन दिए ।
रामगाढवा टोलमा सम्पन्न उक्त कार्यक्रमले स्थानीय समस्या प्रत्यक्ष रूपमा बुझ्ने र समाधानतर्फ अग्रसर हुने प्रतिबद्धतासहित चुनावी माहोललाई थप सक्रिय बनाएको छ । मतदाताहरूले आश्वासनलाई व्यवहारमा उतार्ने नेतृत्वको अपेक्षा व्यक्त गरेका छन् । टेमानीको प्रत्यक्ष संवादमूलक अभियानले पर्सा क्षेत्र नं. २ मा चुनावी प्रतिस्पर्धालाई अझ चासोपूर्ण बनाएको देखिन्छ ।
प्रतिक्रिया दिनुहोस् !