वीरगंज (पर्सा), ८ फागुन । पर्सा निर्वाचन क्षेत्र नम्बर–१ अन्तर्गत पर्ने वीरगंज महानगरपालिका–१६ नगवा टोलमा प्रतिनिधिसभा सदस्यका उम्मेदवार ओमप्रकाश सर्राफले सशक्त घरदैलो अभियान सञ्चालन गर्दै स्थानीय मतदातासँग प्रत्यक्ष संवाद गरेका छन् । जनमत पार्टी का तर्फबाट उम्मेदवार रहेका सर्राफले चुनावी प्रचारलाई जनमुखी बनाउने उद्देश्यसहित टोल–टोल पुगेर नागरिकका समस्या र सुझाव संकलन गरेका हुन् ।
अभियानका क्रममा उनले नगवाका गल्ली र बस्तीहरूमा पुगेर खुला छलफल गरे । वर्षायाममा हुने डुबान, अव्यवस्थित ढल तथा नाला, जीर्ण भित्री सडक, अपर्याप्त सडक बत्ती, अनियमित खानेपानी, फोहोर व्यवस्थापनको कमजोरी, स्वास्थ्य–शिक्षा क्षेत्रका चुनौती, बेरोजगारी तथा सीमावर्ती क्षेत्रसँग सम्बन्धित समस्याबारे स्थानीयले धारणा राखेका थिए । सर्राफले ती सबै गुनासालाई गम्भीरतापूर्वक लिँदै समाधानका लागि ठोस पहल गर्ने प्रतिबद्धता जनाए ।
स्थानीयका अनुसार वर्षा सुरु भएसँगै घर–आँगन डुबानमा पर्ने समस्या दीर्घकालीन रूपमा समाधान गर्न व्यवस्थित नाला तथा ढल निर्माण अत्यावश्यक छ । सर्राफले संघ, प्रदेश र स्थानीय तहबीच प्रभावकारी समन्वय गरी पूर्वाधार विकास योजनामार्फत डुबान नियन्त्रणलाई प्राथमिकतामा राख्ने बताए । ‘विकास कागजमा होइन, नागरिकको दैनिक जीवनमा अनुभूत हुनुपर्छ,’ उनले स्पष्ट पारे ।
भित्री सडक स्तरोन्नति, सडक बत्ती विस्तार र सुरक्षित यातायात व्यवस्थापनलाई पनि उनले प्राथमिकता दिने उल्लेख गरे । सीमावर्ती व्यापारिक क्षेत्र भएकाले ट्राफिक जाम न्यूनीकरण र बजार व्यवस्थापन सुधारका लागि विशेष योजना ल्याउने उनको भनाइ थियो । युवालाई रोजगारी र स्वरोजगारतर्फ उन्मुख गराउन सीपमूलक तालिम, साना–मझौला उद्यम प्रवद्र्धन र लगानीमैत्री वातावरण निर्माणमा जोड दिने उनले बताए ।
खानेपानी तथा सरसफाइका सवालमा पनि उनले स्पष्ट धारणा राखे । स्वच्छ पानी नागरिकको आधारभूत अधिकार भएकाले आपूर्ति प्रणाली सुदृढीकरण र नियमित अनुगमन अपरिहार्य रहेको उनले बताए । फोहोर व्यवस्थापनलाई आधुनिक र दीगो बनाउन नगरस्तरमा ठोस योजना आवश्यक रहेकोमा उनले जोड दिए । स्वास्थ्य र शिक्षातर्फ बढ्दो जनसंख्या अनुसार सेवा विस्तार गर्नुपर्ने मागप्रति सर्राफ सकारात्मक देखिए । आधारभूत स्वास्थ्य सेवा सुदृढीकरण, आवश्यक जनशक्ति व्यवस्थापन तथा सामुदायिक विद्यालयको गुणस्तर अभिवृद्धिमा पहल गर्ने उनले प्रतिबद्धता जनाए । ‘समृद्ध समाज निर्माणका लागि सुदृढ शिक्षा र स्वास्थ्य सेवा आधार हुन्,’ उनले उल्लेख गरे ।
घरदैलो अभियानका क्रममा स्थानीयले सर्राफको सरल शैली र प्रत्यक्ष संवादलाई सकारात्मक रूपमा लिएको बताएका छन् । आश्वासनभन्दा कार्यान्वयनमुखी योजना प्रस्तुत गरेर विश्वास जित्ने प्रयास गरेको भन्दै मतदाताले उत्साह व्यक्त गरेका छन् । विकास, सुशासन र पारदर्शितालाई केन्द्रमा राख्दै पर्सा–१ लाई नमुना निर्वाचन क्षेत्र बनाउने लक्ष्यसहित अघि बढेको उनको अभियानले नगवा टोलमा नयाँ आशा र ऊर्जा थपेको छ । 
प्रतिक्रिया दिनुहोस् !