वीरगंज (पर्सा), ८ फागुन । पर्सा निर्वाचन क्षेत्र नम्बर–२ अन्तर्गत वीरगञ्ज महानगरपालिका–२६ अठराहा सुगौली टोल र पर्सागढी नगरपालिका–झबराहा टोलमा राष्ट्रिय स्वतन्त्र पार्टी (रास्वपा) का प्रतिनिधिसभा सदस्य पदका उम्मेदवार सुशील कुमार कानुले घरदैलो कार्यक्रम सञ्चालन गर्दै मतदातासँग प्रत्यक्ष संवाद गरेका छन् । कानुले मतदातालाई “घण्टी” चुनाव चिन्हमा मतदान गर्न आग्रह गर्दै रास्वपाको करार पत्रअनुसार पाँच वर्षसम्म जनताको सेवामा समर्पित भएर काम गर्ने प्रतिबद्धता व्यक्त गरे ।
कार्यक्रमका क्रममा उनले स्थानीय अस्पतालको अभाव, खेलकुद पूर्वाधारको कमी, कृषि क्षेत्रमा मल र सिँचाइ पानीको समस्या, डुबान, सडक र पूर्वाधारको जीर्ण अवस्था लगायत क्षेत्रीय चुनौतीहरूलाई प्राथमिकतामा राखेर समाधान गर्ने योजना प्रस्तुत गरे । कानुको भनाइमा, “कृषि नै यहाँको मुख्य आधार हो। किसानले समयमै मल र सिँचाइ पानी नपाएसम्म समृद्धिको कल्पना गर्न सकिँदैन, म निर्वाचित भएपछि यी विषयलाई पहिलो प्राथमिकतामा राखेर समाधान गर्नेछु ।”
शिक्षा, स्वास्थ्य, कृषि र पूर्वाधार विकासमा अनुभवको आधारमा काम गर्ने दाबी गर्दै कानुले सुशासन, आर्थिक विकास, रोजगारी सिर्जना, स्वास्थ्य सेवा सुलभ बनाउने र सामुदायिक विद्यालयको गुणस्तर सुधार्ने योजना सार्वजनिक गरे । उनले सरकारी सेवाहरू डिजिटलाइज गरेर पारदर्शी बनाउने, ई–गभर्नेन्स प्रणाली लागू गर्ने र नागरिकको डाटा सुरक्षित राख्ने योजना पनि बताएका छन् ।
युवालाई लक्षित गर्दै उनले स्थानीय स्तरमै पशुपालनसम्बन्धी तालिम, स्वरोजगार र साना–मझौला उद्यम प्रवद्र्धन गर्ने योजना प्रस्तुत गरे । यसले वैदेशिक रोजगारीमा जान बाध्य युवालाई आफ्नै गाउँ–ठाउँमै भविष्य निर्माण गर्ने अवसर प्रदान गर्ने कानुको भनाइ थियो ।
घरदैलोका क्रममा झबराहा, बढनिहार र अठराहा सुगौली क्षेत्रका ज्येष्ठ नागरिक, महिला, युवा र बुद्धिजीवी समुदायले कानुको पक्षमा खुला समर्थन जनाए । सहभागीहरूले “अबको नेतृत्व परिवर्तनको हो” र “मतदान सन्तानको भविष्यका लागि” जस्ता नारासहित उत्साह देखाए । कुल मिलाएर, घरदैलो अभियानले पर्सा–२ का मतदातामा रास्वपाप्रति बढ्दो आकर्षण र स्थानीय स्तरमा सकारात्मक परिवर्तनको अपेक्षा स्पष्ट रूपमा देखाएको छ । 
प्रतिक्रिया दिनुहोस् !