वीरगंज (पर्सा), ७ फागुन । पर्सा निर्वाचन क्षेत्र नम्बर १ मा प्रतिनिधिसभा सदस्य पदका नेकपा (एमाले) उम्मेदवार प्रदीप यादवले बिहीबार वीरगंज महानगरपालिका ४ र ५ मा घरदैलो तथा जनता दर्शन कार्यक्रम सम्पन्न गरेका छन् । आगामी फागुन २१ गते हुने निर्वाचनको पूर्वसन्ध्यामा आयोजित यस कार्यक्रममा यादवले मतदातासँग प्रत्यक्ष संवाद गर्दै आफ्नो विगतको योगदानको मूल्याङ्कन गर्न र सही नेतृत्वमा आफ्नो मत दिन आग्रह गरेका थिए ।
कार्यक्रमका क्रममा यादवले दुवै वडाका प्रत्येक घरमा पुगेर स्थानीय मतदातासँग भेटघाट गरेका थिए । उनले जनताको सुख दुखमा सधैं उपस्थित रहेर काम गरेका नेतालाई चयन गर्नुपर्नेमा जोड दिए । पूर्व मन्त्रीसमेत रहेका यादवले निर्वाचनले केवल क्षेत्रीय मात्रै नभई राष्ट्रिय स्तरमा देशको भविष्य निर्धारण गर्ने भएकाले मतदाताले आफ्नो अमूल्य मत विवेकपूर्ण प्रयोग गर्नुपर्ने बताउँदै, ‘सही व्यक्ति र दललाई मतदान गर्नु आजको जिम्मेवारी हो,’ भन्दै मतदाता अगाडि स्पष्ट अपील गरेका थिए ।
यादवले आफ्नो विगतका दुई कार्यकालका अनुभव र योगदानलाई स्मरण गराउँदै क्षेत्रको पूर्वाधार, स्वास्थ्य, शिक्षा र रोजगारी क्षेत्रमा गरेको कामको मूल्याङ्कन गर्न मतदातालाई आग्रह गरे। उनले चुनावी मौसमी नेता र केवल भोटका लागि देखिने ‘स्टन्ट’ गर्ने नेताबाट सावधान रहन सुझाव दिँदै भने, ‘म चुनावी मौसमी नेता होइन, जनताले यसलाई बुझ्न सक्छन् । केहीले भोटका लागि जे पनि बोल्छन्, तर चुनावपछि गायब हुन्छन् । यो देशलाई संकटबाट बाहिर निकाल्न सक्ने दल एमाले मात्रै हो ।’
यादवले आफ्नो अभियान पूर्णतया विकास र जनताको आवश्यकता केन्द्रित रहेको बताउँदै, एमालेको नेतृत्वमा मात्रै स्थायी समृद्धि सम्भव भएको दाबी गरे । उनले मतदातालाई एमालेमा मतदान गर्न आग्रह गर्दै भने, ‘अमूल्य मत दिदै विकास र स्थायित्व सुनिश्चित गर्न सक्ने पार्टीलाई समर्थन गर्नु जरुरी छ ।’ घरदैलो कार्यक्रममा नेकपा (एमाले) की केन्द्रीय सदस्य निर्मला देवकोटा, क्षेत्रीय संयोजक मानदेव हजरा, नेताहरू शम्भु गुप्ता, सुन्दर कुर्मी, वडा नम्बर ५ का वडाध्यक्ष प्रदीप चौरसिया लगायतका पदाधिकारीहरूले पनि सहभागिता जनाउँदै मतदातासँग संवाद गरेका थिए ।
स्थानीयहरूले यादवको विगतका कार्यहरूलाई सकारात्मक रूपमा मूल्याङ्कन गर्दै निर्वाचनमा समर्थन गर्ने प्रतिबद्धता व्यक्त गरेका छन् । यस कार्यक्रमले पर्सा १ मा एमालेको पक्षमा मतदाता सम्बन्ध सुदृढ गर्दै चुनावी रणनीतिलाई थप बलियो बनाएको विश्लेषकहरूले बताएका छन् । 
प्रतिक्रिया दिनुहोस् !