वीरगंज (पर्सा), ६ फागुन । आगामी फागुन २१ गते हुने प्रतिनिधिसभा सदस्य निर्वाचनअन्तर्गत पर्सा निर्वाचन क्षेत्र नं. १ मा चुनावी प्रतिस्पर्धा रोचक मोडमा पुगेको छ । यस क्षेत्रमा व्यापारी पृष्ठभूमिका उम्मेदवार र लामो राजनीतिक अनुभव भएका नेताबीच मुख्य भिडन्त हुने आकलन गरिएको छ । विशेषगरी नेपाल कम्युनिष्ट पार्टी (एमाले) का प्रदीप यादव र नेपाली कांग्रेसका अनिल रुंगटाबीच कडा प्रतिस्पर्धा हुने राजनीतिक वृत्तमा चर्चा छ ।
एमालेका उम्मेदवार यादव पूर्व मन्त्री तथा निर्वतमान सांसद हुन् । मधेश आन्दोलनको पृष्ठभूमिबाट राजनीतिक यात्रा सुरु गरेका उनी पछिल्लो समय जनता समाजवादी पार्टी परित्याग गरी एमालेबाट चुनावी मैदानमा उत्रिएका हुन् । दल परिवर्तन गरेसँगै मधेशका एजेन्डा त्यागेको आरोप उनीमाथि लाग्दै आएको छ । तर यादवले भने आफूले मन्त्री र सांसदका रूपमा गरेका विकास निर्माणका कामलाई आधार बनाएर मत मागिरहेका छन् । आफ्नो कार्यकालमा क्षेत्रको पूर्वाधार, शिक्षा र अन्य विकासका क्षेत्रमा योगदान दिएको दाबी गर्दै उनले सधैं जनताको सुख–दुःखमा साथ दिएको बताउँदै आएका छन् ।
यता कांग्रेसका उम्मेदवार रुंगटा उद्योगी तथा व्यवसायीका रूपमा परिचित छन् । उनी समानुपातिक कोटाबाट संविधानसभा सदस्य भइसकेका व्यक्ति हुन् । संविधानसभा सदस्य रहँदा उल्लेखनीय उपलब्धि हासिल गर्न नसकेको र चुनावी समयमा मात्र सक्रिय हुने गरेको आरोप उनीमाथि लाग्दै आएको छ । त्यस्तै, उनले सञ्चालन गरेको उद्योगका कारण सिर्सिया नदी प्रदूषित बनेको तथा नेपाली कामदारको सट्टा भारतीय कामदार बढी रोजगारी दिएको भन्ने विषयमा स्थानीयस्तरमा असन्तोष देखिएको छ । यद्यपि, रुंगटाले यी आरोप अस्वीकार गर्दै आफू विकास र आर्थिक रूपान्तरणको स्पष्ट योजनासहित मैदानमा उत्रिएको बताएका छन् । उनले निर्वतमान सांसदको कार्यशैलीप्रति प्रश्न उठाउँदै अब क्षेत्रलाई नयाँ सोच र नेतृत्व आवश्यक रहेको दाबी गरेका छन् ।
यस निर्वाचन क्षेत्रमा अन्य राजनीतिक दलका उम्मेदवारहरू पनि सक्रिय रूपमा चुनावी प्रतिस्पर्धामा छन् । राष्ट्रिय स्वतन्त्र पार्टी (रास्वपा) बाट हरि पन्त, नेपाल कम्युनिष्ट पार्टी बाट अजय चौरसिया, जनता समाजवादी पार्टी (जसपा) नेपाल बाट रामनरेश यादव, जनमत पार्टी बाट ओमप्रकाश सर्राफ, उज्यालो नेपाल पार्टी बाट रामकिशोर सिंह (पराग) तथा राष्ट्रिय प्रजातन्त्र पार्टी बाट नन्दु श्रीवास्तवलगायत उम्मेदवार मैदानमा छन् ।
रास्वपाका उम्मेदवार पन्त पेशाले होटल व्यवसायी हुन् र राजनीतिमा अपेक्षाकृत नयाँ अनुहारका रूपमा देखिएका छन् । त्यस्तै नेकपाका उम्मेदवार चौरसिया चार्टर्ड एकाउन्टेन्ट (सिए) पृष्ठभूमिबाट आएका नयाँ प्रतिस्पर्धी हुन् । उज्यालो नेपाल पार्टीका पराग भने वडाध्यक्ष पदबाट राजीनामा दिएर संघीय संसदतर्फ उक्लिएका छन् ।
राजनीतिक विश्लेषकहरूका अनुसार यस क्षेत्रको मुख्य प्रतिस्पर्धा यादव र रुंगटाबीच केन्द्रित रहने सम्भावना बढी छ । यद्यपि, रास्वपाले देशभर वैकल्पिक राजनीतिक शक्तिको रूपमा आकर्षण बढाइरहेका बेला त्यसको प्रभाव पर्सा–१ मा पनि देखिन सक्ने आँकलन गरिएको छ । विशेषगरी रास्वपाले काठमाडौं महानगरका प्रमुख बालेन्द्र शाह (बालेन) लाई प्रधानमन्त्रीको सम्भावित उम्मेदवारका रूपमा अघि सारेको सन्देशले युवापुस्तामाझ उत्साह थपेको विश्लेषण गरिएको छ ।
निर्वाचन मिति नजिकिँदै जाँदा पर्सा–१ मा घरदैलो, सभा–सम्मेलन र मतदाता भेटघाट तीव्र बनेका छन् । अब मतदाताले अनुभव र नयाँ विकल्पमध्ये कसलाई रोज्छन् भन्ने चासो बढ्दो छ । यस पटकको परिणामले पर्सा–१ को मात्र होइन, समग्र मधेश क्षेत्रको राजनीतिक दिशासमेत संकेत गर्ने अपेक्षा गरिएको छ ।
प्रतिक्रिया दिनुहोस् !