वीरगंज (पर्सा), ६ फागुन । पर्सा निर्वाचन क्षेत्र नम्बर-१ का रामकिशोर सिंह (पराग) ले वीरगंज महानगरपालिका विभिन्न वडामा घरदैलो तथा पार्टी प्रवेश कार्यक्रम सम्पन्न गर्दै मतदातासँग प्रत्यक्ष संवाद गरेका छन् । कार्यक्रमको मुख्य उद्देश्य स्थानीय समस्याहरू बुझ्नु र आगामी प्रतिनिधिसभा निर्वाचनका लागि जनसमर्थन जुटाउनु रहेको थियो ।
सिंहले वडा नं. ७ अन्तर्गत कुम्हालटोल र रामटोल तथा वडा नं. ३२ को तेढा गाउँमा घरदैलो गर्दै स्थानीयबासी र युवाहरूका गुनासा र सुझाव सुनेका थिए । सहभागीहरूले बस्ती व्यवस्थापन, नाला र सडक सुधार, शिक्षा र स्वास्थ्य सेवामा देखिएका समस्या र रोजगारी अभावजस्ता मुद्दा उठाएका थिए । विशेषगरी युवाहरूले रोजगारी नपाउँदा केही युवा लागुऔषधको चपेटामा परेको विषय उठाउँदा सिंहले यसलाई गम्भीर समस्या ठानेर तुरुन्तै समाधानका लागि प्रतिबद्धता व्यक्त गरे ।
उम्मेदवार सिंहले निर्वाचित भएलगत्तै स्थानीय कलकारखानामा योग्य र स्थानीय युवाहरूलाई रोजगारीका अवसर दिने, सीपमूलक तालिम सञ्चालन गर्ने तथा स्वरोजगारका कार्यक्रम अघि बढाउने योजना रहेको बताए । उनले गाउँटोलको समग्र विकास, सडक र नालाको स्तरोन्नति, शिक्षा र स्वास्थ्य क्षेत्रमा सुधार ल्याउने प्राथमिकतामा काम गर्ने प्रतिबद्धता पनि व्यक्त गरे ।
कार्यक्रममा स्थानीय बासिन्दाले उज्यालो नेपाल पार्टीका अध्यक्ष कुलमान घिसिङ जस्तै परिणाममुखी र काम गर्ने नेतृत्व आवश्यक रहेको बताए । ‘हामी तपाईंको साथमा छौं, तपाईं पनि त्यस्तै प्रभावकारी काम गर्नुहोस्,’ स्थानीयहरूले सिंहलाई प्रोत्साहित गर्दै विश्वास व्यक्त गरे ।
सिंहले आफ्नो विगतको अनुभवलाई संघीय संसदसम्म पुर्याउँदै क्षेत्रीय विकासका मुद्दाहरूलाई सशक्त रूपमा उठाउने र समस्याहरूको दीर्घकालीन समाधान ल्याउने दाबी पनि गरे । उनका यी योजनाहरूले मतदातामा विश्वास निर्माण गर्दै युवाहरूको आकर्षणको केन्द्र बनाएको विश्लेषकहरूले बताएका छन् ।
घरदैलो तथा पार्टी प्रवेश कार्यक्रममा स्थानीय युवाहरूको उल्लेख्य सहभागिता रहेको थियो । यसले सिंहको क्षेत्रीय उपस्थितिलाई बलियो बनाएको र आगामी निर्वाचनमा जनसमर्थनमा वृद्धि गर्ने संकेत दिएको छ । सिंहको अभियानले स्थानीय मुद्दा र विकासमुखी एजेन्डालाई प्राथमिकतामा राख्दै मतदातासँग प्रत्यक्ष सम्पर्क कायम गरेको विश्लेषकहरूले बताएका छन् । 
प्रतिक्रिया दिनुहोस् !