वीरगंज (पर्सा), ६ फागुन । पर्सा जिल्लामा निर्वाचनको माहोल तातिँदै जाँदा राष्ट्रिय स्वतन्त्र पार्टी (रास्वपा) ले आफ्नो चुनावी गतिविधि तीव्र बनाएको छ । पर्सा–१ का प्रतिनिधिसभा सदस्य पदका उम्मेदवार तथा रास्वपा पर्सा सभापति हरि पन्तले घरदैलो अभियानलाई थप सक्रिय बनाउँदै संगठन सुदृढीकरण र पार्टी कार्यालय विस्तारलाई समानान्तर रूपमा अघि बढाएका छन् ।
वीरगंजको हरपतगञ्ज क्षेत्रमा आयोजित घरदैलो कार्यक्रममा उल्लेख्य संख्यामा स्थानीय बासिन्दाको सहभागिता देखिएको थियो । टोल टोलमा पुगेर मतदातासँग प्रत्यक्ष भेटघाट गरेका पन्तले सुशासन, पारदर्शिता, भ्रष्टाचार नियन्त्रण र जनउत्तरदायी प्रशासनलाई आफ्नो प्रमुख चुनावी एजेन्डा भएको स्पष्ट पारे । उनले परम्परागत राजनीतिक संस्कारबाट आजित नागरिकले अब नयाँ विकल्प रोज्नुपर्ने समय आएको धारणा व्यक्त गरे ।
कार्यक्रमका क्रममा समर्थकहरूले घण्टी बजाउँदै ‘जय घण्टी’ तथा ‘अबकी बार, वैकल्पिक सरकार’ जस्ता नाराले वातावरण उत्साहपूर्ण बनाएका थिए । ‘राजनीति सेवा गर्ने माध्यम हो, सत्ताको साधन होइन,’ भन्ने सन्देश दोहोर्याउँदै पन्तले जनताको अपेक्षा पूरा गर्ने प्रतिबद्धता व्यक्त गरे ।
घरदैलोका क्रममा स्थानीयवासीले रोजगारी अभाव, कृषि क्षेत्रको समस्या, सडक तथा आधारभूत पूर्वाधार, शिक्षा र स्वास्थ्य सेवाको गुणस्तर लगायत समग्र आर्थिक राजनीतिक अस्थिरताबारे जिज्ञासा राखेका थिए । प्रत्युत्तरमा पन्तले योजनाबद्ध, पारदर्शी र परिणाममुखी विकासमार्फत यी समस्या समाधान गर्ने अठोट व्यक्त गरे । साथै, केन्द्र सरकारसँग प्रभावकारी समन्वयका लागि रास्वपालाई समर्थन गर्न आग्रह गरे ।
यसै सन्दर्भमा, पन्तले इनरुवामा रास्वपाको सम्पर्क कार्यालय उद्घाटनसमेत गरेका छन् । उद्घाटन कार्यक्रममा उनले स्थानीयवासीबाट प्राप्त माया, विश्वास र साथप्रति कृतज्ञता व्यक्त गर्दै त्यसलाई सधैं सम्मान गर्ने प्रतिबद्धता जनाए । कार्यक्रम विजय साहको सभापतित्वमा सम्पन्न भएको थियो भने सहजीकरण सन्तोष पटेलले गरेका थिए । महानगर सभापति अमन आलम, जिल्ला सचिव सुदिश प्रजापती, दिलिप कुर्मी, मुकेध पटेललगायत नेताहरूको उपस्थिति रहेको थियो । कार्यालय स्थापनामा सम्साद आलम, तबरेज अहमद र सन्नी कुमार गुप्ताले सक्रिय भूमिका निर्वाह गरेका थिए ।
निर्वाचन मिति नजिकिँदै जाँदा पर्सामा प्रमुख राजनीतिक दलहरू घरदैलो, सभासम्मेलन र संगठन विस्तारमार्फत मतदाता आकर्षित गर्न प्रतिस्पर्धात्मक रूपमा जुटेका छन् । रास्वपाले भने आफूलाई वैकल्पिक राजनीतिक शक्तिको रूपमा स्थापित गर्दै जनसमर्थन विस्तार गर्ने रणनीति अघि बढाएको जनाएको छ । 
प्रतिक्रिया दिनुहोस् !