वीरगंज (पर्सा), ६ फागुन । पर्सा निर्वाचन क्षेत्र नम्बर–२ का प्रतिनिधिसभा सदस्य पदका उम्मेदवार राष्ट्रिय स्वतन्त्र पार्टीका सुशील कुमार कानुले बुधबार वीरगंज महानगरपालिका–३, छपकैयामा घरदैलो तथा जनता दर्शन कार्यक्रम आयोजना गरेका छन् । कार्यक्रममा उनले स्थानीय मतदातासँग प्रत्यक्ष संवाद गर्दै आफ्ना विकास योजना र प्रतिबद्धताहरू प्रस्तुत गरे ।
कानुले रास्वपाको करार पत्रअनुसार आगामी पाँच वर्षसम्म जनताको सेवा गर्ने वाचा गर्दै पर्सा क्षेत्रको जीवनस्तर उकास्ने र भुईँ तहका नागरिकहरूको आवाज संसद्मा पुर्याउने बताएका छन् । उनले भने, ‘मसँग पर्साको सर्वाङ्गीण विकासका लागि स्पष्ट एजेन्डा, रोडम्याप र ब्लु प्रिन्ट छ ।’
उक्त कार्यक्रममा कानुले विगतका निर्वाचित प्रतिनिधिहरूमाथि रोजगार, शिक्षा, स्वास्थ्य र पूर्वाधार क्षेत्रमा पर्याप्त काम नगरेको आरोप लगाउँदै निर्वाचित भए तुरुन्तै परिवर्तन गर्ने दाबी गरे । उनले मतदातालाई घण्टी चुनाव चिन्हमा मतदान गर्न आग्रह गर्दै रास्वपाका सबै उम्मेदवारलाई विजयी गराएर मधेशी समुदायका बालेन्द्र शाहलाई देशकै पहिलो प्रधानमन्त्री बनाउन सकिने बताएका छन् ।
कानुले शिक्षा, स्वास्थ्य, कृषि र पूर्वाधार विकासमा प्राथमिकता दिने प्रतिवद्धता दोहोर्याए । साथै मुस्लिम महिला र युवाहरूलाई रोजगारीमुखी तथा सीपमूलक तालिम प्रदान गर्ने योजना अगाडि सार्ने बताए । कार्यक्रममा छपकैयाका स्थानीयवासी, विशेषगरी युवाहरू र ज्येष्ठ नागरिकहरूको उल्लेखनीय सहभागिता देखियो । युवा मतदाताहरूले उत्साहपूर्वक स्वागत गर्दै ‘परिवर्तनका लागि घण्टीमा मत हालौँ’ भन्ने नारासहित समर्थन जनाए ।
संचालन समितिका अनुसार कार्यक्रमले क्षेत्रीय विकास र जनप्रतिनिधित्वका मुद्दामा कानुको स्पष्ट दृष्टिकोण र योजना जनसमुदायसमक्ष प्रभावकारी रूपमा प्रस्तुत गरेको छ । मतदातासँग प्रत्यक्ष संवाद गर्दै उनले जनताको माग, समस्या र अपेक्षाहरू सुनेका थिए र ती प्राथमिकताका आधारमा आफ्नो कार्यसूची निर्माण गर्ने प्रतिबद्धता व्यक्त गरे । निर्वाचन नजिकिँदै गर्दा पर्सा–२ मा घरदैलो, जनता भेटघाट र संवाद कार्यक्रमहरू तीव्र गतिमा सञ्चालन भइरहेका छन् । कानुको यो कार्यक्रममा देखिएको व्यापक सहभागिता र उत्साहले रास्वपाको क्षेत्रीय उपस्थितिलाई बलियो बनाएको विश्लेषकहरूले बताएका छन् ।
प्रतिक्रिया दिनुहोस् !