वीरगंज (पर्सा), ५ फागुन । पर्सा निर्वाचन क्षेत्र नं. १ का प्रतिनिधिसभा सदस्य उम्मेदवार ओमप्रकाश सरार्फले घरदैलो अभियानलाई अझ सशक्त बनाउँदै मतदातासँग प्रत्यक्ष भेटघाटलाई प्राथमिकता दिएका छन् । जनमत पार्टी का तर्फबाट उम्मेदवार सरार्फले वीरगंज महानगरपालिका वडा नं.–१५ भिस्वा र वडा नं.–२३ सबैठवामा साँझको चुनावी सभामार्फत स्थानीय बासिन्दासँग संवाद गरेका हुन् ।
घरदैलोका क्रममा उनले टोल–टोल पुगेर सर्वसाधारणले भोगिरहेका समस्या प्रत्यक्ष सुने । वडा नं.–१५ भिस्वामा जीर्ण सडक, प्रभावकारी ढल निकासको अभाव, खानेपानी संकट र सरसफाइ व्यवस्थापनको कमजोरी मुख्य रूपमा उठाइएको थियो । वर्षायाममा सडक हिलाम्मे हुने, पानी जमेर दुर्गन्ध फैलिने अवस्था अन्त्य गर्न स्थानीयले तत्काल पहल गर्न माग गरेका छन् ।
वडा नं.–२३ सबैठवामा पनि आधारभूत पूर्वाधारकै समस्या दोहोरिएको छ । कच्ची सडक, अव्यवस्थित नाला, पर्याप्त सडकबत्ती नहुनु, स्वास्थ्य सेवामा पहुँचको कमी तथा युवाका लागि रोजगारी अवसर अभावजस्ता विषय स्थानीयले उम्मेदवारसमक्ष राखेका थिए । सुरक्षित सडक, नियमित सफाइ र स्वास्थ्य सेवा विस्तारलाई प्राथमिकतामा राख्न उनीहरूले जोड दिएका छन् ।
स्थानीयको गुनासो सुनेपछि सरार्फले जनविश्वासलाई परिणाममा रूपान्तरण गर्ने प्रतिबद्धता दोहोर्याए । ‘जनताले देखिने र महसुस हुने विकास खोजिरहेका छन् । सडक, ढल, खानेपानी, सरसफाइ र स्वास्थ्य सेवा सुधार मेरो पहिलो एजेन्डा हुनेछ,’ उनले भने । उनले सुझावलाई चुनावी घोषणापत्रको केन्द्रमा राख्दै स्थानीयस्तरमै रोजगारी सिर्जना, युवा उद्यमशीलता प्रवद्र्धन, साना तथा मध्यम व्यवसायलाई सहजीकरण र पूर्वाधार विकासलाई तीव्रता दिने योजना प्रस्तुत गरे । जनतासँग सीधा संवाद नै वास्तविक लोकतान्त्रिक अभ्यास भएको उनको भनाइ थियो ।
कार्यक्रममा युवा, महिला र ज्येष्ठ नागरिकको उल्लेख्य उपस्थिति देखिएको थियो । स्थानीयले यसपटक काम गर्ने र विकासमुखी उम्मेदवारलाई समर्थन गर्ने संकेत गरेका छन् । पार्टीका नेता–कार्यकर्ताको सक्रियतासहित सम्पन्न कार्यक्रमले क्षेत्र नं. १ मा चुनावी गतिविधि थप तीव्र भएको देखिएको छ । सरार्फले आगामी दिनमा अन्य वडामा पनि घरदैलो अभियान निरन्तर जारी राख्ने बताएका छन् ।
प्रतिक्रिया दिनुहोस् !