वीरगंज (पर्सा), ५ फागुन । सर्लाहीको मलंगवामा कार्यरत सब–इन्जिनियर प्रमोद कुमार यादवको गोली हानी हत्या गरिएको घटनाको विरोधमा वीरगंजमा प्रदर्शन गरिएको छ । मंगलबार घण्टाघर क्षेत्रमा भेला भएका प्रदर्शनकारीहरूले हातमा नाराले भरिएका प्लेकार्ड बोकेर दोषीलाई तत्काल पक्राउ गरी कडा कारबाही गर्न माग गरेका हुन् । प्रदर्शनमा सहभागीहरूले हत्यामा संलग्न व्यक्ति अझै खुला रूपमा हिँडिरहेको आरोप लगाउँदै सरकारको निष्क्रियताप्रति असन्तोष व्यक्त गरे ।
उनीहरूले शान्तिपूर्ण रूपमा न्यायको माग राख्दै पीडित परिवारलाई न्याय दिलाउन राज्य गम्भीर हुनुपर्ने बताए । मलङ्गवा नगरपालिका–१० देवीटोलस्थित डेराबाट बाहिर बोलाएर अज्ञात समूहले फागुन ३ गते साँझ करिब ८ बजे ३६ वर्षीय प्रमोद कुमार यादवमाथि गोली प्रहार गरेको प्रहरीले जनाएको छ । यादवको स्थायी घर क्गपजष्उगच नगरपालिका–६ बैशाखामा रहेको छ । उनी सर्लाहीको भौतिक पूर्वाधार विकास कार्यालयमा सब–इन्जिनियरका रूपमा कार्यरत थिए ।
सर्लाहीका प्रहरी उपरीक्षक योगेन्द्रकुमार खड्काका अनुसार यादव सोही दिन दिउँसो मात्रै बुबाको काजकिरिया सम्पन्न गरी मलंगवा फर्किएका थिए । घर पुगेको केही समयमै उनीमाथि आक्रमण भएको उनले बताए । मृतककी श्रीमती पुनम यादवका अनुसार मोटरसाइकलमा आएका व्यक्तिले प्रमोदलाई कोठाबाट बाहिर बोलाएका थिए । बाहिर निस्किएलगत्तै उनको देब्रे छातीमा गोली प्रहार गरिएको थियो । घटनापछि घाइते अवस्थाबाट उनलाई उद्धार गरी प्रादेशिक अस्पताल मलंगवा लगिए पनि चिकित्सकले मृत घोषणा गरेका थिए ।
घटनास्थलबाट प्रहरीले गोलीको एक खोका बरामद गरेको छ । प्रहरी नायव उपरीक्षक (डीएसपी) सरोज राईका अनुसार प्रारम्भिक अनुसन्धानले सानो हतियार अर्थात् पेस्तोल प्रयोग भएको संकेत गरेको छ । घटनाबारे विस्तृत अनुसन्धान जारी रहेको प्रहरीले जनाएको छ । यसैबीच, घटनाको विरोधस्वरूप नेपाल इन्जिनियर्स एसोसिएशन वीरगंज च्याप्टर/केन्द्रले मंगलबार बिहान ९ बजेदेखि दिउँसो ३ बजेसम्म ‘पेन डाउन’ कार्यक्रम सञ्चालन गरेको छ । च्याप्टरका सभापति ई. प्रियान्सु गुप्ताका अनुसार कार्यालय समयमा कालोपट्टी बाँधेर शान्तिपूर्ण विरोध जनाइएको हो ।
मधेश प्रदेश अन्तर्गत कार्यरत कर्मचारीहरुको पेनडाउन
भौतिक पूर्वाधार विकास मन्त्रालय, मधेश प्रदेशअन्तर्गत कार्यरत कर्मचारीले सब–इन्जिनियर प्रमोदकुमार यादवको हत्या घटनाको विरोधमा मंगलबार ‘पेनडाउन’ गरेका छन् । कर्मचारीले हातमा कालोपट्टी बाँधेर कार्यालयको कामकाज पूर्ण रूपमा ठप्प पार्नुका साथै घटनाको निष्पक्ष तथा शीघ्र छानबिनको माग गरेका छन् ।
पूर्वाधार विकास कार्यालय सर्लाहीमा कार्यरत सब–इन्जिनियर यादवको आइतबार राति मलङ्गवा नगरपालिका–१० मा अज्ञात समूहले गोली हानी हत्या गरेको थियो । यस घटनापछि प्रदेशभरिका प्राविधिक र प्रशासनिक कर्मचारी आन्दोलित बनेका छन् । आन्दोलनमा सहभागी कर्मचारीले सार्वजनिक सेवामा खटिएका प्राविधिकमाथि भइरहेको आक्रमणले कार्यस्थलको सुरक्षा कमजोर भएको बताए ।
साथै, दोषीलाई तत्काल पक्राउ गरी कानुनी कारबाही गर्न सरकारसँग माग गरेका छन् । कर्मचारीका विभिन्न सङ्घसङ्गठनले संयुक्त विज्ञप्ति जारी गर्दै घटनालाई गम्भीरतापूर्वक लिन आग्रह गरेका छन् । यस्ता हिंसात्मक घटनाले कर्मचारीको मनोबल घटाउने र सेवा प्रवाहमा प्रत्यक्ष असर पार्ने विज्ञप्तिमा उल्लेख छ ।
प्रतिक्रिया दिनुहोस् !