वीरगंज (पर्सा), ४ फागुन । पर्सा क्षेत्र नं. २ मा प्रतिनिधिसभा सदस्यका उम्मेदवार अशोक कुमार टेमानीले आफ्नो घरदैलो अभियानलाई थप सशक्त बनाउँदै मतदातासँग प्रत्यक्ष संवादलाई प्राथमिकता दिएका छन् । जनता समाजवादी पार्टी (जसपा) का केन्द्रीय सदस्यसमेत रहेका टेमानीले उद्योग, व्यवसाय र समाजसेवामा हासिल गरेको लामो अनुभवलाई अब नीति निर्माण र क्षेत्रीय विकासमा रूपान्तरण गर्ने प्रतिवद्धता जनाउँदै अभियान अघि बढाएका हुन् ।
३५ वर्षभन्दा बढीको व्यावसायिक यात्रामा उद्योग, व्यापार, आयात निर्यात, अन्तर्राष्ट्रिय व्यवसाय तथा लजिस्टिक्स क्षेत्रमा दक्षता हासिल गरेका टेमानीले आफूलाई ‘व्यवहारिक अनुभव भएको उम्मेदवार’ का रूपमा प्रस्तुत गरिरहेका छन् । घरदैलोका क्रममा उनले स्थानीय बासिन्दासँग शिक्षा, स्वास्थ्य, रोजगारी, पूर्वाधार विकास, उद्योग व्यापार प्रवद्र्धन, युवा उद्यमशीलता र लगानीमैत्री वातावरण निर्माणका विषयमा विस्तृत छलफल गरिरहेका छन् ।
टोल टोलमा पुगेर मतदाताको गुनासो सुन्ने र तत्कालै समाधानका सम्भावित उपायहरू प्रस्तुत गर्ने शैलीले टेमानीको अभियानलाई अन्य उम्मेदवारभन्दा फरक बनाएको समर्थकहरूको दाबी छ । ‘हामीलाई भाषण होइन, समाधान चाहिएको छ,’ एक स्थानीय व्यवसायीले भने, ‘टेमानीज्यूले उद्योग र रोजगारीका विषयमा स्पष्ट योजना सुनाउनुभएको छ ।’
टेमानीले आफ्नो अन्तर्राष्ट्रिय अध्ययन र अनुभवलाई पनि अभियानको मुख्य एजेण्डा बनाएका छन् । हार्वर्ड विश्वविद्यालय (अमेरिका) मा नेतृत्व तथा सार्वजनिक नीति सम्बन्धी कार्यकारी शिक्षा, अमेरिका, जापान र डेनमार्कमा प्राप्त व्यवस्थापन तथा स्वच्छ उत्पादन तालिमको अनुभवलाई नेपालमा व्यवहारिक रूपमा लागू गर्ने उनको प्रतिबद्धता छ । ‘स्थानीय सम्भावनालाई अन्तर्राष्ट्रिय अवसरसँग जोड्न सकियो भने पर्सा आर्थिक रूपमा आत्मनिर्भर बन्न सक्छ,’ टेमानीले एक अन्तरक्रियामा बताएका छन् ।
उनको संस्थागत नेतृत्व अनुभव पनि अभियानमा प्रमुख आधार बनेको छ । नेपाल उद्योग वाणिज्य महासंघ मधेश प्रदेशका अध्यक्ष, एफ.एन.सि.सि.आई. नेपालका कार्यकारी बोर्ड सदस्य तथा वीरगंज उद्योग वाणिज्य संघका पूर्व अध्यक्षको रूपमा काम गरिसकेका टेमानीले उद्योग व्यवसाय क्षेत्रको नीतिगत समस्या नजिकबाट बुझेको दाबी गर्छन् ।
घरदैलो अभियानका क्रममा युवाहरूले रोजगारी र सीप विकास केन्द्र स्थापना, महिलाहरूले स्वरोजगार र सहुलियत कर्जा, किसानहरूले कृषि प्रशोधन उद्योगको माग अघि सारेका छन् । टेमानीले यी मागहरूलाई आफ्नो प्राथमिक कार्यसूचीमा राख्ने आश्वासन दिएका छन् । ‘स्थानीय उत्पादनलाई मूल्य श्रृंखलासँग जोडेर रोजगारी सिर्जना गर्नु मेरो पहिलो प्राथमिकता हुनेछ,’ उनले बताएका छन् ।
समाजसेवामा सक्रिय भूमिकाका कारण पनि टेमानी स्थानीय समुदायमा परिचित छन् । नेपाल रेडक्रस सोसाइटी, नेत्र ज्योति संघ, लायन्स क्लव तथा शैक्षिक संस्थासँगको संलग्नताले उनलाई सामाजिक उत्तरदायित्वप्रति प्रतिबद्ध नेतृत्वका रूपमा चिनाएको समर्थकहरूको भनाइ छ । अभियानको क्रममा टेमानीले स्पष्ट सन्देश दिइरहेका छन् ‘अब विकासका लागि अनुभवी र नीति दृष्टि भएको नेतृत्व आवश्यक छ ।’ उनका अनुसार पर्सा क्षेत्र नं. २ लाई औद्योगिक हब, रोजगारी केन्द्र र शैक्षिक स्वास्थ्य पूर्वाधारमा अग्रणी क्षेत्रका रूपमा विकास गर्न सकिने सम्भावना छ, यदि सही योजना र पारदर्शी कार्यान्वयन भयो भने ।
घरदैलो अभियानसँगै टेमानीको चुनावी सक्रियता तीव्र बन्दै गएको छ । प्रत्यक्ष संवाद, स्पष्ट योजना र अनुभवको संयोजनले उनको उम्मेदवारीलाई बलियो बनाएको समर्थकहरूको विश्वास छ । अब मतदाताको निर्णयले पर्सा क्षेत्र नं. २ को विकास यात्रामा नयाँ अध्याय सुरु हुने कि नहुने तय गर्नेछ ।
प्रतिक्रिया दिनुहोस् !