मलङ्गवा (सर्लाही), ३ फागुन । सर्लाही प्रहरीले ४० लाख रुपैयाँ घुस लिएर दुई जना भारतीय हुण्डी कारोबारीलाई रातारात छाडेको घटना सार्वजनिक भएको छ । भारतको विहार राज्य अन्तर्गत सितामढीस्थित गुदरी बजारका कुख्यात भनिएका हुण्डी कारोबारी शम्भु प्रसाद र कृष्ण प्रसादलाई पक्राउ गरी सर्लाही प्रहरीले ४० लाख रुपैयाँ लिएर रातारात छाडेको श्रोतले जनाएको छ ।
घटनाको सुरुआत गत बुधबार साँझ सर्लाहीको राजश्री चोकस्थित गोरखकाली रोडबाट भएको बताइन्छ । जिल्ला प्रहरी कार्यालय सर्लाही मातहतको अपराध अनुसन्धान शाखाबाट खटिएको टोलीले सेतो रङको इनोभा कार र कालो रङको स्कर्पियोसहित दुई जनालाई नियन्त्रणमा लिएको थियो । उनीहरू हुण्डी कारोबार सम्बन्धी रकम लिन नेपाल प्रवेश गरेका थिए र उनीहरुलाई सर्लाहीको सर्लाही मोतिपुरका हुण्डी कारोबारी उमेश यादवले प्रहरी लगाएर पक्राउ गर्न लगाएको बताइएको छ ।
यादवको इसारामा प्रहरीले पक्राउ गरेको भारतीय नागरिकहरुको साथबाट कुनै रकम वा प्रमाण बरामद नभएपनि सर्लाही प्रहरीले अनुसन्धानका लागि भन्दै जिल्ला प्रहरी कार्यालय लगिएको उनीहरूलाई त्यही रात ४० लाख रुपैयाँ लिएर इनोभा कारसहित छाडिएको बताइएको छ । प्रहरी श्रोतका अनुसार यस घटनामा सर्लाहीका प्रहरी उपरीक्षक योगेन्द्र कुमार खड्का र अपराध अनुसन्धान शाखाका प्रमुख प्रहरी निरीक्षक विशाल बुढाथोकीको मिलेमतो रहेको बताइएको छ ।
यो प्रकरणले सर्लाही प्रहरी र हुण्डी कारोबारीबीचको कथित ‘कनेक्सन’लाई उजागर गरेको चर्चा चुलिएको छ । पक्राउ परेका भारतीय नागरिकहरू सर्लाहीको मोतिपुर निवासी तथा खुटौना स्कुलमा कार्यरत शिक्षक उमेश यादवसँग हुण्डीको पैसा लिन नेपाल आएका थिए । आरोप अनुसार नेपालमै बसेर भारततर्फको हुण्डी कारोबारीसँग मिलेर हुण्डी कारोबार गर्दै आएका उमेश यादवले ती भारतीय कारोबारीसँग ८० लाख रुपैयाँ लिएका थिए तर फिर्ता नगरेको कारण चार जनाको समूह रकम असुल्न नेपाल प्रवेश गरेका थिए ।
रकम असुल्न नेपाल प्रवेश गरेका दुबै भारतीय नागरिकलाई सर्लाहीका हुण्डी कारोबारी उमेश यादवले प्रहरी लगाएर समात्न लगाएको प्रहरी श्रोतकै दाबी छ । उमेश यादवले रकम फिर्ता गर्नुको सट्टा प्रहरीसँग मिलेमतो गरी उल्टै भारतीय नागरिकहरूलाई पक्राउ गराएको दाबी गरिएको छ । बिना ठोस प्रमाण पक्राउ परेका विदेशी नागरिकलाई लामो समय हिरासतमा राख्न कानुनी जटिलता हुने देखिएपछि प्रहरी र सम्बद्ध व्यक्तिबीच ‘सम्झौता’ भएको र ४० लाख रुपैयाँ लिएर रिहा गरिएको श्रोतले जनाएको छ ।
यदि यी आरोप सत्य प्रमाणित भएमा यो घटना केवल घुस प्रकरण मात्र नभई कानुन कार्यान्वयन निकायमाथि गम्भीर प्रश्न उठाउने विषय हुनेछ । सीमा क्षेत्रमा सक्रिय हुण्डी कारोबार र त्यसमा प्रहरीको सम्भावित संलग्नता राष्ट्रको वित्तीय सुरक्षासँग प्रत्यक्ष जोडिएको विषय हो । ४० लाखको कथित ‘डिल’ले प्रहरी संगठनको विश्वसनीयतामाथि गम्भीर आघात पुर्याएको छ । यदि सत्य हो भने, यो प्रकरणले सीमावर्ती जिल्लामा फैलिएको हुण्डी सञ्जाल र त्यसमा प्रहरी–कारोबारी गठजोडको गहिरो जालो उजागर गर्न सक्छ ।
यस घटनाबारे जिल्ला प्रहरी कार्यालय सर्लाहीका एस.पी. योगेन्द्र खड्कासँग बुझ्दा केही प्रमाण फेला नपरेकोले छाडेको हुन सक्छ, यसबारे आफूलाई जानकारी नभएकोले मुद्दाका इन्स्पेक्टरसँग कुरा गर्न भने । यता मुद्दाका शाखाका प्रमुख प्रहरी निरीक्षकको कार्यालयको मोबाइल नम्बर ९८५४०७१४४४ मा बुझ्दा प्रहरी निरीक्षक विशाल बुढाथोकीको निर्देशनमा छाडिएको बताए । पक्राउ परेका व्यक्तिसँग कुनै प्रमाण फेला नपरेको र प्रनि बुढाथोकीले छाड्न निर्देशन दिएपछि छाडिएको बताए ।
प्रतिक्रिया दिनुहोस् !