वीरगंज (पर्सा), १६ माघ । नेपाली कम्युनिष्ट पार्टी (नेकपा) पर्सा निर्वाचन क्षेत्र नं. २ का उम्मेदवार मनोज चौधरीले नयाँदेखि पुराना नेताहरूको बीचमा आफू अब्बल उम्मेदवार भएको दाबी गरेका छन् । उनले नेपाली कम्युनिष्ट पार्टी पर्सागढी नगरपालिकाको अगुवा कार्यकर्ता भेलालाई सम्बोधन गर्दै यस्तो बताएका हुन् ।
चौधरीले नेपाली कम्युनिष्ट पार्टीसँग देश निर्माणका लागि स्पष्ट खाका र एजेण्डा रहेको उल्लेख गर्दै मतदाताहरूलाई हावाको पछि नलाग्न आग्रह गरे। उनले विचार, नीति र योजनाका आधारमा मतदान गर्नुपर्नेमा जोड दिए ।
सोनमलामाको अध्यक्षता तथा रामचन्द्र साहको प्रमुख आतिथ्यतामा सम्पन्न भेलाले बिरेन्द्र यादवको संयोजकत्वमा १०१ सदस्यीय निर्वाचन परिचालन समिति गठन गरेको छ । समितिको सह–संयोजकमा सोनमलामा, अरुण रेग्मी र टेकनारायण महतो चयन भएका छन् भन्ने जानकारी नेपाली कम्युनिष्ट पार्टी पर्सागढीले दिएको छ ।
भेलाका प्रमुख अतिथि रामचन्द्र साहले निर्वाचनपछि नेपाली समाजवादको नेतृत्व नेपाली कम्युनिष्ट पार्टीले गर्ने दाबी गर्दै निर्वाचन अभियानमा पार्टीका उम्मेदवारलाई विजयी गराउन पार्टी पंक्ति एकताबद्ध भएर लाग्न सबै अगुवा नेता तथा कार्यकर्तालाई आग्रह गरे । भेलामा पार्टीका केन्द्रीय सदस्यहरू किशोरी कशवाहा, विपिन यादव, बृजलाल पासवानलगायतको उपस्थिति रहेको थियो । कार्यक्रमको स्वागत मन्तव्य बलराम आचार्यले गरेका थिए ।
प्रतिक्रिया दिनुहोस् !