नेकपा एमालेले पर्सा जिल्लाका चारवटै प्रतिनिधिसभा निर्वाचन क्षेत्रमा उम्मेदवार टुंगो लगाउँदै आगामी निर्वाचनका लागि स्पष्ट राजनीतिक सन्देश दिएको छ । उम्मेदवार छनोटको प्रक्रियाले एमालेको वर्तमान रणनीति, संगठनात्मक प्राथमिकता र मधेस राजनीतिप्रतिको दृष्टिकोणलाई एकसाथ उजागर गरेको देखिन्छ ।
पर्सा निर्वाचन क्षेत्र नम्बर १ बाट एमालेले जसपा नेपाल परित्याग गरी आइतबार राति मात्रै पार्टी प्रवेश गरेका पूर्व मन्त्री तथा निवर्तमान सांसद प्रदीप यादवलाई उम्मेदवार बनाएको छ । ओली निवास गुण्डु पुगेर औपचारिक रूपमा एमाले प्रवेश गरेका यादवले तत्काल टिकट पाउनु आफैंमा एमालेको व्यावहारिक राजनीति र चुनावी यथार्थ बुझ्ने क्षमतालाई संकेत गर्छ । जसपा नेपालले टिकट नदिने निर्णय गरेपछि एमाले रोजेका यादव २०७४ र २०७९ मा सोही क्षेत्रबाट लगातार दुई पटक प्रतिनिधिसभा सदस्य निर्वाचित भइसकेका अनुभवी नेता हुन् । क्षेत्र नम्बर १ मा एमालेले ‘परीक्षित अनुहार’ मार्फत जितको सम्भावना बलियो बनाउने रणनीति अपनाएको देखिन्छ ।
क्षेत्र नम्बर २ मा भने एमालेले फरक बाटो रोजेको छ । वीरगंज महानगरपालिका वडा नम्बर २९ निवासी रिमा यादवलाई उम्मेदवार बनाएर पार्टीले नयाँ अनुहारलाई अवसर दिएको छ । सक्रिय राजनीतिमा लामो समयदेखि नरहेकी र कानून क्षेत्रमा लामो समयदेखि योगदान पुर्याउँदै आएका प्रद्युम्न यादवकी पत्नी रिमा यादवलाई अघि सार्नु एमालेको सामाजिक सन्तुलन, स्थानीय पहुँच र नयाँ मतदातालाई आकर्षित गर्ने प्रयासका रूपमा लिन सकिन्छ । यसले पार्टीभित्र नेतृत्व विस्तार र नयाँ पुस्तालाई राजनीतिमा ल्याउने संकेत पनि दिन्छ ।
पर्सा क्षेत्र नम्बर ३ मा एमालेले अनुभव र राजनीतिक निरन्तरतालाई प्राथमिकता दिएको छ । मधेस प्रदेशसभा सदस्य तथा पूर्व शिक्षामन्त्री प्रमोद जयसवाललाई उम्मेदवार बनाएर एमालेले यस क्षेत्रको राजनीतिक यथार्थलाई आत्मसात गरेको देखिन्छ । २०७९ को निर्वाचनमा जसपा नेपालबाट टिकट नपाएपछि स्वतन्त्र उम्मेदवार बनेर प्रदेशसभा सदस्यमा निर्वाचित भएका जयसवाल डेढ वर्षअघि मात्रै एमालेमा प्रवेश गरेका थिए । उनको उम्मेदवारीले एमालेप्रति मधेसका प्रभावशाली नेताहरूको आकर्षण बढ्दो क्रममा रहेको सन्देश दिन्छ ।
क्षेत्र नम्बर ४ मा एमालेले पुनः जालिम मियाँमाथि भरोसा गरेको छ । २०७९ को निर्वाचनमा कांग्रेस उम्मेदवार रमेश रिजालसँग झिनो मतान्तरले पराजित भएका मियाँलाई दोहोर्याउनु पार्टीको ‘निरन्तरता र पुनः प्रयास’ को नीति झल्काउने निर्णय हो । २०७४ मा जगरनाथपुर गाउँपालिकाको अध्यक्ष निर्वाचित भइसकेका मियाँ स्थानीय स्तरमा परिचित र अनुभवी नेता मानिन्छन् ।
समग्रमा हेर्दा, पर्सामा एमालेले अपनाएको उम्मेदवार छनोट रणनीतिले अनुभव र नयाँपन, जित्ने सम्भावना र संगठन विस्तारबीच सन्तुलन खोजेको स्पष्ट देखिन्छ । कतै पार्टी परिवर्तनबाट आएका प्रभावशाली नेता, कतै नयाँ अनुहार, कतै पुनः अवसर पाएका पुराना उम्मेदवार-यी सबैले एमालेले पर्सालाई केवल निर्वाचन क्षेत्रका रूपमा नभई राजनीतिक प्रयोगशालाका रूपमा पनि हेरेको संकेत गर्छ । अब यी निर्णयले जनमतमा कस्तो प्रभाव पार्छ भन्ने प्रश्नको उत्तर भने आगामी निर्वाचनले नै दिनेछ । 
प्रतिक्रिया दिनुहोस् !