वीरगंज (पर्सा), १ माघ । देशभर माघे सङ्क्रान्ति पर्व श्रद्धा, भक्ति र उल्लासका साथ मनाइएको छ । माघ १ गते बिहीबार सूर्य धनु राशिबाट मकर राशिमा प्रवेश गर्ने भएकाले यस पर्वलाई मकर सङ्क्रान्ति पनि भनिन्छ । यही दिनदेखि उत्तरायण सुरु हुने धार्मिक विश्वासअनुसार दिन क्रमशः लामा र रात छोटा हुँदै जान्छन् ।
उत्तरायण आरम्भको दिन स्नान, जप, तपस्या, ध्यान र दानलाई विशेष पुण्यदायी मानिने परम्पराअनुसार देवघाट, त्रिशूली, कालीगण्डकी, वाग्मती, इन्द्रावती, त्रिवेणी, रिडी लगायतका प्रमुख तीर्थस्थलहरूमा बिहानैदेखि माघ स्नान गर्ने श्रद्धालुहरूको ठूलो भीड देखिएको थियो ।
तराई-मधेश क्षेत्रमा माघ १ लाई ‘नहान’ अर्थात् नुहाउने पर्वका रूपमा मनाइन्छ । यस अवसरमा घ्यू, चाकु, तिलका परिकार, तरुल, पालुङ्गो तथा खिचडी खाने चलन रहेको छ । माघे सङ्क्रान्तिको अवसर पारेर देशका विभिन्न स्थानमा मेला, सांस्कृतिक कार्यक्रम तथा उत्सवहरू आयोजना गरिएका छन् ।
यसै अवसरमा माघी महोत्सव मूल समारोह समिति पर्साले वीरगंजमा आदिवासी थारु समुदायको नयाँ वर्ष २६५० को उपलक्ष्यमा भव्य कार्यक्रम आयोजना गरेको छ । शुभकामना आदान-प्रदान, सांस्कृतिक प्रस्तुति र र्यालीसहित कार्यक्रम सम्पन्न भएको हो । कार्यक्रम संयोजक जङ्गबहादुर चौधरीका अनुसार थारु समुदायको परम्परा, संस्कृति र पहिचान उजागर गर्ने उद्देश्यले वीरगंज नगर परिक्रमा गर्दै सांस्कृतिक र्याली निकालिएको थियो । र्यालीपछि स्वीमिङ पुल क्षेत्रमा विशेष कार्यक्रम आयोजना गरिएको थियो ।
कार्यक्रममा थारु समुदायका मौलिक नृत्य-गीत, सामा–चकेवा, झम्टा, पूर्वी नाच, बालबालिकाद्वारा प्रस्तुत गीत-नृत्य तथा बाल कला प्रदर्शनीले दर्शकको ध्यान तानेको थियो । साथै घोंगी, केकडा, माछा, परेवा, हाँस, कुखुरा, चिचरलगायत परम्परागत थारु खानाका परिकारहरूको प्रदर्शनीले कार्यक्रमलाई थप आकर्षक बनाएको थियो ।
यस्तै पर्साको सखुवाप्रसौनी गाउँपालिका-स्थित श्रीपुर पचगाँवामा आयोजित माघी विशेष कार्यक्रममा कांग्रेसका केन्द्रीय सदस्य सुरेन्द्र चौधरीले देश जटिल मोडमा पुगेको उल्लेख गर्दै सबैले स्वार्थ त्यागी जनहितमा लाग्नुपर्ने आवश्यकता औँल्याए । उनले थारु समुदायको विशिष्ट संस्कृति र पहिचान नेपालको गौरव भएको बताए । कार्यक्रममा थारु समुदायका अगुवा तथा विभिन्न क्षेत्रका व्यक्तिहरूको उल्लेख्य सहभागिता रहेको थियो । 
त्यसैगरी जिराभवानी गाउँपालिका वडा नं. ३ नौकाटोला चौकमा माघी महोत्सव भव्य रूपमा सम्पन्न भएको छ । गाउँपालिकाको आयोजना तथा वडा नं. ३ का युवा समाजको व्यवस्थापनमा सम्पन्न महोत्सव वडाध्यक्ष सुरज राय थारुको सभापतित्व तथा मधेश प्रदेश सरकारका वन तथा वातावरण मन्त्री शंकर प्रसाद चौधरीको प्रमुख आतिथ्यमा सम्पन्न भएको थियो । सहभागीहरूले कुटो, कोदालो, माछा मार्ने खोखी, डेली लगायत सामग्री बोकी बाजागाजासहित गाउँ परिक्रमा गरेका थिए ।
महोत्सवमा वक्ताहरूले माघी पर्वको शुभकामना व्यक्त गर्दै थारु समुदायको भाषा, कला, संस्कृति र परम्परागत खानाको संरक्षणमा जोड दिए । लागूऔषध दुर्व्यसन नियन्त्रण र अनावश्यक भोजभतेर कम गर्न आग्रहसमेत गरिएको थियो । राष्ट्रिय थारु कलाकार मुस्कान चौधरी, निशा चौधरी र नेपाली निरहुवाको प्रस्तुति महोत्सवको मुख्य आकर्षण बनेको थियो ।
यसैगरी पटेर्वासुगौली गाउँपालिकामा थारु सम्बत् २६५० तथा पाँचौँ माघी खिचडी महोत्सव हर्षोल्लासका साथ सम्पन्न भएको छ । गाउँपालिका अध्यक्ष दिनेश कुमार चौधरीको सभापतित्वमा आयोजित महोत्सवमा स्वस्तिका चौधरी, सागर चौधरी र नेपाली निरहुवाले दर्शकलाई झुमाएका थिए । नृत्य प्रतियोगितामा पकडिया युनिक ग्रुप प्रथम, ब्रह्मबाबा समूह द्वितीय र गुदरबाबा समूह तृतीय भएका छन् ।
यसरी माघे सङ्क्रान्ति तथा माघी पर्वले देशभर धार्मिक आस्था, सांस्कृतिक गौरव र सामाजिक सद्भाव झल्काउँदै उल्लासपूर्ण वातावरण सिर्जना गरेको छ ।
राष्ट्रिय कृषि जैविक विविधता दिवस
माघ १ गते बिहीबार अर्थात् मकर सङ्क्रान्तिकै दिन कृषि तथा पशुपन्छी विकास मन्त्रालयले ‘राष्ट्रिय कृषि जैविक विविधता दिवस’ पनि मनाएको छ । माघे सङ्क्रान्तिमा तरुल, सखरखण्ड र पिँडालु जस्ता कन्दमूलको व्यापक प्रयोग हुने भएकाले यस्ता स्थानीय बालीको संरक्षण र संवर्धन गर्ने उद्देश्यले गत वर्षदेखि यो दिवस मनाउन थालिएको हो । कन्दमूलको प्रयोगलाई चाडपर्वमा मात्र सीमित नराखी खाद्य सुरक्षा र जैविक विविधताको महत्वपूर्ण आधारका रूपमा विकास गर्नुपर्नेमा मन्त्रालयले जोड दिएको छ । 
प्रतिक्रिया दिनुहोस् !