वीरगंज (पर्सा), ३० पुस । आगामी फागुन २१ गते हुने प्रतिनिधि सभा सदस्य निर्वाचन नजिकिँदै जाँदा पर्सा जिल्लाका चारवटै निर्वाचन क्षेत्रमा चुनावी सरगर्मी तीव्र बन्दै गएको छ । प्रमुख राजनीतिक दलहरूले उम्मेदवार सिफारिस प्रक्रिया लगभग टुंग्याइसकेका छन् भने आकांक्षी नेताहरू टिकटका लागि केन्द्रस्तरमा लबिङ, समन्वय र राजनीतिक जोडघटाउमा सक्रिय देखिएका छन् । मनोनयन दर्ताको मिति नजिकिँदै जाँदा पर्सामा चुनावी वातावरण तातेको हो ।
चारवटै क्षेत्रमा पुराना नेताहरू, नयाँ अनुहार, आन्तरिक गुटबन्दी, नयाँ पार्टी र जेन–जि प्रभाव मिसिँदा पर्साको निर्वाचन बहुकोणीय, रोचक र अनिश्चित बन्दै गएको छ । मनोनयन दर्ताको समय नजिकिँदै जाँदा दलहरू उम्मेदवार टुंग्याउने, गठबन्धन बनाउने र रणनीति तय गर्न व्यस्त देखिएका छन् । हालसम्म कुनै पनि दलले अन्तिम उम्मेदवार घोषणा नगरेपनि पर्सा यसपटक मधेश प्रदेशकै सबैभन्दा चासोको निर्वाचन जिल्ला बन्ने संकेत देखिएको छ ।
पर्सा–१ः पुराना अनुहारबीच प्रतिस्पर्धा, नयाँ शक्तिको प्रवेशले समीकरण जटिल
पर्सा निर्वाचन क्षेत्र नम्बर १ मा शीर्ष दलहरूबाट सिफारिस भएका उम्मेदवारबीच कसले टिकट पाउने र कसले चुनाव जित्ने भन्ने विषयमा चर्चा चुलिएको छ । जेन–जि आन्दोलनको प्रभाव देखिन सक्ने आँकलन भइरहँदा अधिकांश पुरानै अनुहार दोहोरिएपनि केही नयाँ नामहरूले पनि चुनावी मैदान तताएका छन् ।
जनता समाजवादी पार्टीबाट पूर्व मन्त्री तथा निर्वतमान सांसद प्रदीप यादवको एकल नाम सिफारिस भएको छ । यद्यपि जसपा नेपालतर्फ पूर्व मुख्यमन्त्री लालबाबु राउत गद्दीसहित तीन जनाको नाम सिफारिस भएकाले यादव कुन दलबाट उम्मेदवार बन्ने भन्ने अझै स्पष्ट छैन ।
नेपाली कांग्रेसभित्र संस्थापन पक्षबाट अनिल रुंगटा र शेखर कोइराला पक्षबाट अजय द्विवेदीसहित तीन जनाको नाम सिफारिस भएको छ । पार्टी कारबाही फुकुवा भएपछि द्विवेदी पुनः सक्रिय बनेसँगै कांग्रेसभित्र टिकटको प्रतिस्पर्धा झनै जटिल बनेको छ । नेकपा एमालेले अरबिन्द सिंहसहित सात जनाको नाम सिफारिस गरेको छ । प्रभु हजरा, सुन्दर कुर्मी, नवराज शर्मा, बसरुदिन अंसारी तथा महिला उम्मेदवार ममता गुप्ता र इन्दु घिमिरेको नाम सूचीमा रहेको छ ।
राष्ट्रिय स्वतन्त्र पार्टीबाट जिल्ला सभापति हरि पन्त र प्रदेश सभा सदस्य रहबर अन्सारीको नाम चर्चामा छ । जनमत पार्टीबाट ओमप्रकाश सर्राफ सक्रिय देखिएका छन् भने उज्यालो नेपाल पार्टीबाट रामकिशोर सिंह (पराग) चुनावी तयारीमा छन् । अन्य दल र स्वतन्त्र उम्मेदवारसमेत मैदानमा आउन सक्ने भएकाले पर्सा–१ मा उम्मेदवारको संख्या उच्च हुने संकेत देखिएको छ ।
पर्सा–२ः कांग्रेस, एमाले र नयाँ शक्तिबीच त्रिपक्षीय संघर्षको संकेत
पर्सा निर्वाचन क्षेत्र नम्बर २ मा पनि चुनावी गतिविधि तीव्र बनेको छ । नेपाली कांग्रेसबाट अजय चौरसिया, राजेन्द्र बहादुर आमात्य र राकेश यादव सिफारिस भएपछि कांग्रेसभित्र टिकट कसले पाउने भन्ने अन्योल कायमै छ । नेकपा एमालेबाट पूर्व मन्त्री राजकुमार गुप्ता, अरविन्द सिंह र केन्द्रीय सदस्य निर्मला देवकोटाको नाम सिफारिस भएको छ । गुप्ता भ्रष्टाचार मुद्दामा थुनामा रहेकाले एमालेभित्र वैकल्पिक उम्मेदवारको खोजी तीव्र बनेको छ ।
प्रचण्ड–माधव नेपाल नेतृत्वको नेकपाबाट मनोज चौधरी, सत्यनारायण रौनियार र प्रभाकर गुप्ताको नाम सिफारिस भएको छ । राप्रपाबाट विना जयसवाल कुर्मीको नाम बलियो देखिएको छ । जसपा नेपालबाट सुरेन्द्र प्रसाद कुर्मी र अशोक टेमानीसहित आधा दर्जन नाम सिफारिस भएका छन् । जनमत पार्टीबाट नविन प्रकाश साहको नाम अगाडि देखिएको छ । रास्वपाले उम्मेदवार टुंगो लगाइसकेको छैन भने नेपाल जनता पार्टीका सन्तोष पटेलले हिन्दु राष्ट्रको एजेन्डासहित उम्मेदवारी घोषणा गरिसकेका छन् । 
पर्सा–३ः एमालेभित्र तीव्र रस्साकस्सी, कांग्रेस र नेकपाबाट बलिया दाबेदार
पर्सा निर्वाचन क्षेत्र नम्बर ३ मा एक दर्जनभन्दा बढी आकांक्षी देखिएका छन् । एमालेबाट पूर्व मन्त्री तथा निर्वतमान सांसद राजकुमार गुप्ता, रुपेश पाण्डे र पूर्व मन्त्री प्रमोद जयसवालसहित करिब १० जनाको नाम सिफारिस भएको छ । गुप्ता थुनामा रहेकाले एमालेभित्र वैकल्पिक उम्मेदवार खोज्ने प्रयास तीव्र बनेको छ ।
नेपाली कांग्रेसबाट पूर्व मन्त्री सुरेन्द्र चौधरी र पूर्व मन्त्री तथा जिल्ला सभापति जनार्दन सिंह क्षेत्रीको नाम सिफारिस भएको छ । नेकपाबाट रामबाबु बैठा, छोटेलाल यादव र विक्रम चौरसियाको नाम अघि सारिएको छ । जनमत पार्टीबाट मालती कुशवाहाले चुनावी अभियान सुरु गरिसकेकी छन् । जसपा नेपालबाट नरेन्द्र यादव, भरत गिरी र जनार्दन यादवको नाम सिफारिस भएको छ । राजकुमार यादव पुनः उम्मेदवार बन्न सक्ने सम्भावना पनि चर्चामा छ । 
पर्सा–४ः रिजालको पुनरागमन लगभग निश्चित, विपक्षी दलहरूमा प्रतिस्पर्धा
पर्सा क्षेत्र नम्बर ४ मा नेपाली कांग्रेसले पूर्व मन्त्री तथा निर्वतमान सांसद रमेश रिजालको एकल नाम सिफारिस गरेपछि उनको उम्मेदवारी लगभग निश्चित देखिएको छ । नेकपा एमालेबाट जालिम मियाँ, बिरेन्द्र यादव र गोकुली कुमारी रेग्मी सिफारिस भएका छन् । अघिल्लो निर्वाचनका उम्मेदवार जालिम मियाँले नै टिकट पाउने सम्भावना बलियो देखिएको छ ।
नेकपाबाट बलिराम साह, जयप्रकाश थारु र मेनेजर साह सिफारिस भएका छन् । रास्वपाबाट पाँच जना आकांक्षी देखिएका छन् । जसपा–लोसपा एकतापछि डा. कृपासिन्धु चौधरी र लक्ष्मण लाल कर्णमध्ये एक जनाले संयुक्त टिकट पाउनेछन् । जनमत पार्टीबाट सीमा कुशवाहा र आम जनता पार्टीबाट इमदाद गद्दी उम्मेदवार बन्ने निश्चितजस्तै छ । 
प्रतिक्रिया दिनुहोस् !