कलैया (बारा), २५ पुस । बारा जिल्लाको कलैयास्थित यातायात व्यवस्था कार्यालय पछिल्लो समय खुलेआम अराजकता, संगठित भ्रष्टाचार र प्रशासनिक पतनको केन्द्र बन्दै गएको छ । सेवाग्राहीमाथि अन्याय, घुसको आतंक र आन्तरिक सत्ता संघर्ष चरम सीमामा पुगेपछि कार्यालय अब सेवा केन्द्रभन्दा पनि विवाद र बदनामीको अखडा बनेको छ ।
यसको ज्वलन्त उदाहारण हो, बिहीबार निमित्त कार्यालय प्रमुख जीवन पौडेलमाथि कालोमोसो दलिएको घटना । कार्यालयका प्रमुखलाई कालोमोसो दलिएको घटना नौलो होइन, यो भन्दा अघि पनि भ्रष्टाचारकै सन्दर्भमा भागवण्डा नमिल्दा तत्कालीन कार्यालय प्रमुख अरबिन्द दास र एक कर्मचारीबीच कुटाकुट सम्म भएको थियो । कार्यालय प्रमुखलाई कालोमोसो दलिनु, कर्मचारीबीच कुटाकुट हुनु जस्ता घटनाले यातायात कार्यालय संगठित भ्रष्टाचार र प्रशासनिक पतनको केन्द्र बन्दै गएको सहजै अनुमान लगाउन सकिन्छ ।
निमित्त प्रमुखमाथि कार्यकक्षमै कालो मोसो
यातायात व्यवस्था कार्यालय बाराका निमित्त प्रमुख जीवन पौडेलमाथि बिहीबार मध्यान्ह करिब सवा १२ बजे आक्रोशित सेवाग्राहीहरूले कालो मोसो दलेका छन् । प्रत्यक्षदर्शीहरूका अनुसार आफूलाई ‘जेन–जी’ नामले चिनाउने सेवाग्राहीको एक समूहले कार्यालयको सेवा पारदर्शी नभएको, लाइसेन्स वितरणमा पक्षपात भएको, अनियमितता र व्यापक भ्रष्टाचार भएको आरोप लगाउँदै पौडेलको कार्यकक्षमै पुगेर मोसो प्रहार गरेको हो ।
घटनापछि कार्यालय परिसर तनावग्रस्त बनेको थियो । निमित्त प्रमुखमाथि दुर्व्यवहार भएको जानकारी पाउनासाथ जिल्ला प्रहरी कार्यालय बाराबाट प्रहरी टोली परिचालन गरिएको जिल्ला प्रहरी कार्यालय बाराले जनाएको छ । घटनाको अनुसन्धान जारी रहेको बताइएपनि सेवाग्राहीहरू भने लामो समयदेखि संचित आक्रोश विस्फोट भएको बताउँछन् ।
प्रमुख र कर्मचारीबीच कुटाकुट
निमित्त प्रमुखमाथि मोसो प्रहार हुनुभन्दा केहीदिनअघि मात्रै सोही कार्यालयमा भागवण्डा नमिलेको विषयलाई लिएर कुटाकुटको घटना भएको थियो । मंसिर १८ गते साँझ करिब ५ः३० बजे तत्कालीन कार्यालय प्रमुख अबिन्दर दास र खरिदार सत्यनारायण साहबीच सुरु भएको विवाद कुटाकुटमा परिणत हुँदा दुवैजना घाइते समेत भएका थिए ।
जिल्ला प्रहरी कार्यालय बाराका अनुसार झडपमा खरिदार साहको अनुहार सुन्निने गरी चोट लागेको थियो भने प्रमुख दासको अनुहारमा समेत घाउ लागेको थियो । घटनापछि प्रमुख दास, खरिदार साह र दास पक्षका चालकसहित पाँच जनालाई प्रहरीले नियन्त्रणमा लिएर प्रारम्भिक सोधपुछ गरेको थियो । कार्यालयमै समाधान गर्ने सहमतिपछि सबैलाई छाडिएको थियो ।
कुटाकुटको जड कार्यालय प्रमुख दासको सरुवा विवादसँग जोडिएको थियो । श्रम तथा यातायात मन्त्रालयले दासलाई तालिम केन्द्र जनकपुर सरुवा गर्दै सरोज यादवलाई कलैया यातायात कार्यालयको नयाँ प्रमुख तोकेको थियो । तर, दासले सरुवा अस्वीकार गर्दै कार्यालय नछाडेपछि अवस्था जटिल बन्दै कुटाकुटको अवस्थामा पुगेको थियो ।
लाइसेन्स ‘किनबेच’ को संगठित खेल
यातायात व्यवस्था कार्यालय, कलैयामा भएको विवाद केवल प्रशासनिक असहजता मात्र नभई गहिरो संगठित भ्रष्टाचारको परिणाम भएको देखिएको छ । सेवाग्राहीहरूका अनुसार तत्कालीन प्रमुख अबिन्दर दास हाजिर भएदेखि नै यातायात कार्यालयमा लिखित तथा प्रयोगात्मक (ट्रायल) परीक्षामा फेल भएका सेवाग्राहीबाट रकम असुली गरी पास गराउने खुलेआम धन्दा सञ्चालन हुँदै आएको छ ।
सेवाग्राहीहरूका अनुसार मोटरसाइकल लाइसेन्सका लागि १० हजारदेखि १५ हजार रुपैयाँ, चार पाँग्रे सवारीका लागि १५ हजारदेखि २५ हजार रुपैयाँ, हेभी सवारी र मेसिनरी साधनका लागि २५ हजारदेखि ७० हजार रुपैयाँसम्म रकम लिएर फेल भएकालाई पास गराइने गरिएको छ । पैसा बुझाएपछि कम्प्युटर प्रणालीमै पास देखिने गरी लाइसेन्स भेरिफिकेसन मिलाइने गरिएको श्रोतले बताएको छ ।
श्रोतका अनुसार ट्रायल सेन्टरमा जडान गरिएका सिसिटिभी क्यामेराका फुटेजसमेत आवश्यकता अनुसार सम्पादन गरी हटाइने गरिएको छ । लिखित परीक्षामा सेटिङ भएका परीक्षार्थीलाई ५–६ वटा प्रश्नमा मात्र संकेत चिन्ह लगाउन लगाई बाँकी खाली छोडेपछि कर्मचारीहरूले नै उत्तर भरी पास गराउने गरिएको आरोप छ । प्रयोगात्मक परीक्षामा सेटिङ भएका उम्मेदवारका लागि व्यक्तिगत रूपमा खरिद गरिएका मोटरसाइकल प्रयोग गरिने, दक्ष चालकलाई हेल्मेट र मास्क लगाएर अनुहार नदेखिने गरी ट्रायल दिन लगाइने गरेको दाबी गरिएको छ ।
‘आर्थिक आतंक’ र प्रशासनिक पतन
यस अवैध कारोबारमा निमित्त प्रमुख पौडेलका विश्वासपात्र ट्रायल प्रमुख, राजनीतिक पहुँच भएका व्यक्तिहरू र दर्जनभन्दा बढी बिचौलिया सक्रिय रहेको पीडित सेवाग्राहीहरूको आरोप छ । कार्यालयभित्र आर्थिक आतंक सिर्जना भएको र पैसा नदिने सेवाग्राहीलाई जानाजान फेल गराइने गरेको उनीहरुको गुनासो छ ।
लगातार कुटाकुट, मोसो प्रहार र भ्रष्टाचारका गम्भीर आरोपले बारा यातायात कार्यालय मात्र होइन, समग्र यातायात प्रशासनको विश्वसनीयतामाथि गम्भीर प्रश्न खडा गरेको छ । स्थानीयवासी र सेवाग्राहीहरूले निष्पक्ष छानबिन, दोषीमाथि कडा कारबाही र कार्यालयको सम्पूर्ण संरचनागत सुधारको माग गरेका छन् । यदि यस्ता घटनामा समयमै नियन्त्रण र सुधार भएन भने कलैयाको यातायात कार्यालय राज्य संयन्त्रको असफलताको ज्वलन्त उदाहरण बन्ने खतरा बढ्दै गएको छ । 
प्रतिक्रिया दिनुहोस् !