धर्म र आस्थाको सन्दर्भमा संवेदनशील घटनाहरूले मात्र स्थानीय समुदायमा आक्रोश र असुरक्षा सिर्जना गर्दैन, यसले राष्ट्रिय स्तरमा सामाजिक सद्भाव र मेलमिलापमा पनि गहिरो प्रभाव पार्दछ । हालै धनुषा जिल्लाको कमला नगरपालिका–६ सखुवा मनार गाउँको मस्जिदमा भएको तोडफोड र पवित्र कुरान जलाउने घटना त्यसको ताजा उदाहरण हो ।
यस घटनाले मुस्लिम समुदायमा व्यापक आक्रोश सिर्जना गरेको छ । वीरगंजमा आइतबार गरिएको विरोध प्रदर्शनमा सडकमा उत्रिएका सयौँ प्रदर्शनकारीहरूले टायर बाल्दै र चर्का नारा लगाउँदै आफ्नो असन्तुष्टि व्यक्त गरे । तर, यसले प्रदर्शनकारी र सुरक्षाकर्मीबीच सामान्य झडपको स्थिति पनि सिर्जना गर्यो, जसले सुरक्षा चुनौतीको गम्भीरतालाई देखायो । प्रहरी बिटमा भएको तोडफोडले मात्र होइन, सामाजिक सद्भावमा पर्ने खतरा पनि प्रशासनका लागि ठूलो चुनौती बनेको छ ।
धर्मप्रति आपत्तीजनक कार्यले कुनै समुदायमा मात्र आघात पुर्याउँदैन, यसले राष्ट्रिय एकता, सांस्कृतिक सहिष्णुता र समाजको आधारभूत नैतिकतालाई पनि चुनौती दिन्छ । यही कारणले पर्सा प्रशासनले सामाजिक सञ्जालमार्फत धार्मिक द्वेष फैलाउने वा झुट्टा अफवाह फैलाउने गतिविधिमा कडा कानुनी कारबाही गर्ने चेतावनी जारी गरेको छ । फेसबुक, टिकटक, इन्स्टाग्रामजस्ता प्लेटफर्ममा हुने गतिविधिमाथि निगरानी राख्नु केवल कानूनी कदम मात्र होइन, यो समाजमा आपसी विश्वास र सद्भाव कायम राख्ने महत्वपूर्ण प्रयास हो ।
कानुनी दृष्टिले पनि प्रशासनको अपिल उचित छ । मुलुकी अपराध संहिता, २०७४ अन्तर्गत धर्मसम्बन्धी कसुर र विद्युतीय कारोबार ऐन, २०६३ जस्ता प्रावधानले स्पष्ट पार्छ कि कुनै पनि माध्यमबाट जात, धर्म वा समुदायको भावनामा चोट पुर्याउने कार्य दण्डनीय छ । दोषीलाई तीन वर्षसम्म कैद वा लाखौँ रुपैयाँ जरिवाना हुने कानुनी व्यवस्थाले नकारात्मक प्रवृत्तिलाई रोक्ने प्रभावकारी उपायको रूपमा काम गर्न सक्छ ।
तर, केवल कानुनले मात्र समस्या समाधान गर्दैन । स्थानीय समुदाय र नागरिकको सचेतता, सामाजिक जिम्मेवारी र आपसी सम्मानले यसलाई दिगो बनाउनेछ । प्रशासनको अपिललाई स्थानीय बासिन्दाले स्वागत गर्दै सामाजिक सञ्जालको दुरुपयोग रोक्न आवश्यक रहेको धारणा राख्नु सकारात्मक संकेत हो ।
यस घटनाले हामी सबैलाई सम्झाइरहेको छ कि धर्म र आस्था सधैं सम्मानयोग्य हुनु पर्छ । एकपटक आस्थामाथि आघात पुगेपछि त्यसको असर केवल धार्मिक समुदायमा मात्र सीमित हुँदैन, समाजको समग्र शान्ति र मेलमिलापमा समेत असर पुग्छ । अन्तत, कानूनको कडाइ, प्रशासनको सतर्कता र समुदायको जिम्मेवार व्यवहार एकैसाथ आवश्यक छ ।
पर्सा प्रशासनले जारी गरेको चेतावनीले स्पष्ट सन्देश दिन्छ, कि ‘धार्मिक सहिष्णुता, सामाजिक सद्भाव र राष्ट्रिय एकता कुनै पनि बहानामा जोखिममा पार्न सकिँदैन ।’ अब चुनौती स्थानीय समुदायको संयम र सहमति हो समान विश्वास र आपसी सम्मानमा आधारित समाज निर्माण गर्ने वा विभाजनको मार्ग रोज्ने ।
धर्म र कानूनको सम्मान, समाजको सद्भाव र नागरिक जिम्मेवारी यी तीनै तत्वको संयोजन बिना शान्तिपूर्ण सहअस्तित्व सम्भव छैन । पर्सा घटनाले यही पाठ हामी सबैलाई दिएको छ । 
प्रतिक्रिया दिनुहोस् !