वीरगंज (पर्सा), १६ पुस । नेपाल मदिरा व्यवसायी महासंघले देशभरका मदिरा व्यवसायीहरूलाई करसम्बन्धी विषयमा सरल, सहज र व्यवहारिक शिक्षा प्रदान गर्ने उद्देश्यका साथ चार्टर्ड एकाउन्टेन्ट (सि.ए.) अजय चौरासियालाई एक वर्षको अवधिका लागि नियुक्त गरेको छ ।
महासंघका अनुसार पुस १५ गते महासंघको केन्द्रीय कार्यालयमा औपचारिक रूपमा सि.ए. अजय चौरासियालाई कर शिक्षा प्रदान गर्ने जिम्मेवारी दिइएको हो । यस नियुक्तिसँगै आजदेखि अजय चौरासियाले सानो सानो भिडियो क्लिपमार्फत मदिरा व्यवसायीहरूले सजिलै बुझ्ने भाषामा करसम्बन्धी जानकारी प्रदान गर्ने कार्यक्रम सुरु गरेका छन् ।
यी भिडियो क्लिपहरू महासंघको आधिकारिक फेसबुक पेजमार्फत नियमित रूपमा प्रसारण गरिनेछ । भिडियोमा मदिरा व्यवसाय कसरी सुरु गर्ने, करका नयाँ कानुनहरू, हालै भएका कानुनी परिवर्तनहरू, कर दर्ता, कर तिर्ने प्रक्रिया तथा करसँग सम्बन्धित सम्पूर्ण आवश्यक जानकारी समेटिने महासंघले जनाएको छ ।
महासंघले देशभरका सम्पूर्ण मदिरा व्यवसायी साथीहरूलाई यी भिडियो सामग्रीहरू हेरेर जानकारी लिन तथा त्यसबाट लाभ उठाउन हार्दिक अनुरोध गरेको छ । साथै, सबै जिल्ला संघहरूलाई उक्त भिडियो क्लिपहरू आफ्ना आफ्ना जिल्ला संघका फेसबुक पेजमार्फत सेयर गरी अधिक्तम व्यवसायीहरूसम्म जानकारी पुर्याइदिन विशेष आग्रह गरिएको छ ।
करसम्बन्धी थप जानकारी लिन वा व्यक्तिगत रूपमा बुझ्न चाहने व्यवसायीहरूले सि.ए. अजय चौरासियालाई सिधै सम्पर्क गर्न सक्ने व्यवस्था पनि गरिएको छ । उनको सम्पर्क नम्बर ९८१२२५१०५३ रहेको महासंघले जनाएको छ ।
नेपाल मदिरा व्यवसायी महासंघका अध्यक्ष सोनाम शेर्पाले यो पहलले मदिरा व्यवसायीहरूलाई करसम्बन्धी अन्योल हटाउन, कानुन पालना गर्न र व्यवसायलाई व्यवस्थित तथा दिगो बनाउन महत्वपूर्ण योगदान पुग्ने विश्वास व्यक्त गरेका छन् । 
प्रतिक्रिया दिनुहोस् !