वीरगंज (पर्सा), १६ पुस । वीरगंज महानगरपालिकाको आमसञ्चार प्रवद्र्धन तथा नियमन समितिको संयोजक पदमा वरिष्ठ पत्रकार शत्रुघ्न नेपाल नियुक्त भएका छन् । महानगर प्रमुख राजेशमान सिंहले नेपाललाई औपचारिक रूपमा नियुक्ति पत्र प्रदान गर्दै सफल कार्यकालको शुभकामना व्यक्त गरेका हुन् ।
लामो समयदेखि पत्रकारिता क्षेत्रमा सक्रिय रहेका नेपाल समुदायस्तरदेखि राष्ट्रीय मञ्चसम्म कलम चलाउँदै आएका वरिष्ठ पत्रकारका रूपमा परिचित छन् । उनको अनुभव, निष्ठा र व्यावसायिक क्षमतालाई कदर गर्दै समितिको संयोजकको जिम्मेवारी प्रदान गरिएको महानगरपालिकाले जनाएको छ ।
समितिले महानगरपालिका तथा सञ्चारमाध्यमबीच समन्वय मजबुत बनाउने, सूचना प्रवाहलाई प्रभावकारी र पारदर्शी बनाउने, आमसञ्चार क्षेत्रका नीति तथा नियमनसम्बन्धी विषयमा सुझाव दिने जस्ता महत्वपूर्ण भूमिका निर्वाह गर्नेछ । सञ्चार क्षेत्रसँग प्रत्यक्ष सरोकार राख्ने व्यक्तित्व आवश्यक रहेको र नेपालको दीर्घ अनुभवले समितिको कार्यक्षमता अझ सबल हुने विश्वास महानगरले व्यक्त गरेको छ ।
यसअघि समितिको संयोजक ध्रुव अधिकारी रहेका थिए । नेपालको नेतृत्वमा समितिले महानगर र सञ्चार क्षेत्रबीचको सम्बन्धलाई अझ व्यवस्थित र सहज बनाउने अपेक्षा राखिएको छ । 
प्रतिक्रिया दिनुहोस् !